საპარლამენტო უმრავლესობის წევრის თინა ხიდაშელის განცხადებით, რუსი დეპუტატი ლიხაჩოვი რამდენიმეჯერ საქართველოს ხელისუფლებასთან შეუთანხმებლად აფხაზეთის და ცხინვალის რეგიონის ტერიტორიაზე იმყოფებოდა, რითაც მან "ოკუპაციის შესახებ კანონით" გათვალისწინებული მუხლები დაარღვია და ამის გამო მას საქართველოს ხელისუფებამ ქვეყანაში შემოსვლის ნება არ დართო.
ხიდაშელის თქმით, რუსულმა მხარემ ევროსაბჭოს საქართველოსთვის სანქციების გატარების თხოვნით მიმართა, თუმცა აღნიშნულ საკითხზე საქართველოს საპარლამენტო დელეგაცია ევროპის საბჭოს შესაბამის ინფორმაციას მიაწვდის და სანქციების დაწესების საკითხი დღის წესრიგიდან მოიხსნება.
"დიდი იმედი მაქვს, რომ სანქციების დაწესება არ მოხდება. ჩვენ რამდენიმე შეხვედრაზე ვიყავით, სადაც სწორედ ამ თემაზე ვისაუბრეთ. ამ თემაზე ევროკავშირის მხრიდან ძალიან კარგი განცხადება იქნება სესიაზე გაკეთებული. ჩვენ ახლა ვმუშაობთ საპროცედურო კომიტეტთან იმისათვის, რომ განვუმარტოთ წესები ისე, როგორც ჩვენ გვესმის. პირდაპირი მნიშვნელობით თუ ავიღებთ, ევროსაბჭოს სადამკვირვებლო მისიის წევრის ქვეყანაში არშემოშვება 2 წლიან სანქციას ითვალისწინებს, მაგრამ როდესაც იმავე ევროსაბჭოს მიღებული აქვს ბევრი რეზოლუცია ოკუპაციის შესახებ, ეს ერთგვარად წინააღმდეგობაში მოდის,"- განაცხადა თინა ხიდაშელმა.
რაც შეეხება ოკუპირებული ცხინვალის რეგიონის მიმდებარე ქართულ სოფლებში ბოლო დღეებში განვითარებულ მოვლენებს, ხიდაშელის თქმით, აღნიშნულთან დაკავშირებით დეტალურ ინფორმაციას ევროპის საბჭოს რამდენიმე წევრი გააჟღერებს.
"მავთულხლართების თემასთან დაკავშირებით რამდენიმე დეპუტატი დაგვთანხმდა, რომ სწორედ ისინი ისაუბრებენ და ისევ და ისევ იქიდან გამომდინარე, რომ ქართული მხარე მიკერძოებული არ გამოვიდეს,"- აღნიშნა ხიდაშელმა.
დღეს ცნობილი გახდა, რომ ევროსაბჭოში რუსეთის დელეგაცია ქართული მხარისთვის სანქციების დაწესებას ითხოვს. აღნიშნული საკითხი ევროსაბჭოს ბიუროს სხდომაზე დელეგაციის ხელმძღვანელმა ალექსეი პუშკოვმა დააყენა.
რუსეთის დელეგაციის მოთხოვნის მიზეზი დელეგაციის ერთ-ერთი წევრის ვასილი ლიხაჩოვის საქართველოში შემოსვლასა და ევროსაბჭოს მონიტორინგის ჯგუფში მონაწილეობაზე უარის თქმა გახდა, რის მიზეზადაც "ოკუპირებული ტერიტორიების შესახებ" კანონის დარღვევა დასახელდა.
