ევროსაბჭო რუსული მხარის ინიციატივას - საქართველოსთვის სანქციების დაწესების თაობაზე მხარს არ დაუჭერს, - ამის შესახებ ევროსაბჭოში საქართველოს საპარლამენტო ტელეგაციის წევრებმა რუსი დეპუტატის ალქსეი პუშკოვის განცხადების კომენტირებისას ისაუბრეს.
საქართველოს პარლამენტის თავმჯდომარის დავით უსუფაშვილის განცხადებით, რუსი დეპუტატი ლიხაჩოვი საქართველოს ხელისუფლებასთან შეუთანხმებლად რამდენიმეჯერ აფხაზეთის და ცხინვალის რეგიონის ტერიტორიაზე იმყოფებოდა, რითაც მან "ოკუპაციის შესახებ კანონით" გათვალისწინებული მუხლები დაარღვია და ამის გამო მას საქართველოს ხელისუფებამ ქვეყანაში შემოსვლის ნება არ დართო.
"შეხვედრები დასრულდა ევროსაბჭოს საპარლამენტო ასამბლეის თავმჯდომარესთან ბატონ მინიონთან, გენერალურ მდივანთან ბატონ სავიცკისთან და აგრეთვე იმ მომხსენებლებთან, რომლებიც ევროსაბჭოს საპარლამენტო ასამბლეისთვის ამზადებენ საქართველოს თაობაზე მოხსენებას. ამ შეხვედრებზე ყველა თემა განვიხილეთ, მაგრამ ის კონკრეტული საკითხი, რომელიც წინა კვირას გაჩნდა, ყველა ამ შეხვედრაზე შევეხეთ. საქმე ეხება ევროსაბჭოს საარჩევნო მონიტორინგის ჯგუფში რუსეთის დუმის წევრის ბატონი ლიხაჩოვის შეყვანას, რომელიც ჩვენი თხოვნით ბოლო მომენტში იქნა დელეგაციის შემადგენლობიდან ამოღებული, დაახლოებით 10 დღის წინ. იმიტომ, რომ მას ჰქონდა დარღვეული საქართველოს კანონი, რომელიც ითვალისწინებს იმას, რომ საქართველოს მთავრობის თანხმობის გარეშე ოკუპირებულ ტერიტორიებზე შესვლა არის დაუშვებელი და თუ ვინმე ამას ჩაიდენს, მაშინ საქართველოში შემოსვლის შემთხვევაში მას ელის სანქცია. ამის თაობაზე რუსეტის საპარლამენტო დელეგაცია და ზოგიერთი წარმომადგენელი სხვადასხვა ქვეყნებიდან ითხოვენ საქართველოს დასჯას და საქართველოში ევროსაბჭოს ეგიდით ღონისძიებების გამართვის აკრძალვას, მაგრამ ჩვენ გვაქვს ძალიან პრინციპული პოზიცია. მოვახსენეთ ყველას, რომ ეს იქნება ძალიან დიდი უსამართლობა და დარწმუნებული ვართ, რომ ევროპის საბჭო ამას არ გააკეთებს,"- განაცხადა დავით უსუფაშვილმა.
დღეს ცნობილი გახდა, რომ ევროსაბჭოში რუსეთის დელეგაცია ქართული მხარისთვის სანქციების დაწესებას ითხოვს. აღნიშნული საკითხი ევროსაბჭოს ბიუროს სხდომაზე დელეგაციის ხელმძღვანელმა ალექსეი პუშკოვმა დააყენა.
რუსეთის დელეგაციის მოთხოვნის მიზეზი დელეგაციის ერთ-ერთი წევრის ვასილი ლიხაჩოვის საქართველოში შემოსვლასა და ევროსაბჭოს მონიტორინგის ჯგუფში მონაწილეობაზე უარის თქმა გახდა, რის მიზეზადაც "ოკუპირებული ტერიტორიების შესახებ" კანონის დარღვევა დასახელდა.