საქართველოს იუსტიციის მინისტრი თეა წულუკიანი მოქალაქის ქვეყნიდან გასვლის წესებზე მომზადებული კანონპროექტის უფრო მეტ გამჭვირვალეობას მოითხოვს.
"კანონი უნდა იყოს არა მხოლოდ მოქალაქისთვის ნათელი - რისი უფლება აქვს და რისი უფლება არ აქვს, აგრეთვე ნათელი უნდა იყოს იმ საჯარო მოხელისთვისაც, რომელიც ამ კანონს გამოიყენებს. დღევანდელი ფორმულირებით რა თქმა უნდა ეს კანონსპროექტი გარკვეულ შეზღუდვებს აძლევს საჯარო მოხელეს, რაც ჩემი აზრით, დაზუსტებას და დახვეწას საჭიროებს,"- განაცხადა თეა წულუკიანმა.
შეგახსენებთ, რომ "საქართველოს მოქალაქეების საქართველოდან გასვლისა და საქართველოში შემოსვლის წესების შესახებ" კანონში დაგეგმილ ცვლილებეების თანახმად, საქართველოს მოქალაქეს ქვეყნიდან გასვლაზე, პასპორტის გაცემაზე, პასპორტის მოქმედების ვადის გაგრძელებაზე, ასევე საზღვრის გადაკვეთაზე სახელმწიფო ან საზოგადოებრივი უსაფრთხოების დაცვის ინტერესებიდან გამომდინარე შესაძლოა, უარი ეთქვას.
ცნობისთვის, კონსტიტუციის 22-ე მუხლით გათვალისწინებული რეგულაციების თანახმად, ყველას, ვინც კანონიერად იმყოფება საქართველოში, შეუძლია, თავისუფლად გავიდეს საქართველოდან. კონსტიტუციაში არნიშნულია, რომ ამ უფლებათა შეზღუდვა შეიძლება მხოლოდ კანონის შესაბამისად, დემოკრატიული საზოგადოების არსებობისათვის აუცილებელი სახელმწიფო უშიშროების ან საზოგადოებრივი უსაფრთხოების უზრუნველყოფის, ჯანმრთელობის დაცვის, დანაშაულის თავიდან აცილების ან მართლმსაჯულების განხორციელების მიზნით.
