"თუკი რაიმე წინადადება არსებობს პრეზიდენტის მხრიდან, რომელიც რეალურად შეძლებს სიტუაციის გაუმჯობესებას, დროის ფაქტორი აქ არაფერი მოსახსენიებელია,"- ამის შესახებ პოლიტოლოგმა სოსო ცისკარიშვილმა პრეზიდენტ მიხეილ სააკაშვილის იმ განცხადების კომენტირებისას ისაუბრა, რომლის თანახმად, პრეზიდენტი მთავრობას ოკუპირებული ცხინვალის რეგიონის მიმდებარე სოფლებში ბოლო დღეებში განვითარებულ მოვლენებზე სათანადო რეაგირებისთვის თანამშრომლობას სთავაზობს.
ცისკარიშვილის შეფასებით, "თუ პრეზიდენტის მიერ გაჟღერებული წინადადებები რეალურ შედეგზე ორიენტირებული და ქვეყნის ინტერესებისთვის სასარგებლო აღმოჩნდება, ხელისუფლების წარმომადგენელთა განცხადებები იმის შესახებ, რომ მიხეილ სააკაშვილმა დააგვიანა, უადგილოა".
"26 ოქტომბერსაც რომ განაცხადოს ისეთი რამ, რაც შეიძლება მან იცოდეს და სხვამ - არა და რაც წაადგება ქვეყანას, რასაკვირველია იგი ყურადღების ღირსი უნდა იყოს,"- განაცხადა სოსო ცისკარიშვილმა.
ცნობისთვის, საქართველოს პრეზიდენტმა მიხეილ სააკაშვილმა ამერიკის შეერთებული შტატებიდან დაბრუნების შემდეგ ოკუპირებული ცხინვალის რეგიონის მიმდებარე სოფლებში განვითარებულ მოვლენებთან დაკავშირებით ისაუბრა და აღნიშნა, რომ მთავრობის ნებისმიერ ინიციატივას დაუჭერს მხარს, რომელიც ქვეყნის დეოკუპაციისკენ იქნება მიმართული. მთავრობის წევრებმა თანამშრომლობის შესახებ პრეზიდენტის შეთავაზებას უპასუხეს, რომ მიხეილ სააკაშვილმა მეტისმეტად დააგვიანა, პრემიერ-მინისტრი ბიძინა ივანიშვილი კი, მიიჩნევს, რომ "მიხეილ სააკაშვილი კარგ მასწავლებლად ვერ გამოდგება, რადგან არსებული პრობლემების დიდი ნაწილი სწორედ მისი მმართველობის პერიოდიდან იღებს სათავეს".
