ხვალიდან, პირველი ოქტომბრიდან ,,საზოგადოებრივ მაუწყებელზე" ჟურნალისტი ეკა მიშველაძე ახალ პოლიტიკურ თოქ-შოუს პირველი სტუდია" წაიყვანს. როგორც ,,ჯი-ეიჩ-ენთან" საუბარში მიშველაძემ განაცხადა გადაცემა ყოველ სამუშაო დღეს 21:00 საათზე გავა.
,,პოლიტიკური თოქ-შოუ სახელწოდებით ,,პირველი სტუდია" ხვალ, 1-ელ ოქტომბრიდან ,,საზოგადოებრივი მაუწყებლის" ეთერში გავა. გადაცემა კვირაში ხუთი დღის განმავლობაში, ყოველ სამუშაო დღეს გავა. აქედან ოთხი დღის განმავლობაში აუდიტორიის გარეშე, ხოლო პარასკევს კვირის შემაჯამებელი თოქ-შოულ იქნება აუდიტორიასთან ერთად", _განაცხადა ,,ჯი-ეიჩ-ენთან" საუბარში ეკა მიშველაძემ.
მისივე განმარტებით, ამ ეტაპზე გადაცემას მარტო წაიყვანს, მაგრამ დაგეგმილია ტელეწამყვანების დამატება, თუმცა ამ დროისთვის უცნობია ვინ იქნებიან ისინი.
,,ჩემი სურვილია იყო, რომ ხუთი დღის განმავლობაში ეთერში არ ვყოფილიყავი, რადგან რთულია ყოველდღე ერთი და იგივე წამყვანის ყურება, ამიტომ თუ კიდევ დაამატებენ წამყვანებს და კვირის დღეებს გავინაწილებთ უკეთესი იქნება. თუმცა ამ ეტაპზე გადაცემის წამყვანი მხოლოდ მე ვარ", _განაცხადა მიშველაძემ, რომელმაც აღნიშნა, რომ პირველი სტუდია" ეთერში საათნახევრის განმავლობაში გავა.
,,ჯი-ეიჩ-ენის" შეკითხვას რით იქნება გამორჩეული ,,პირველი სტუდია" სხვა პოლიტიკური თოქ-შოუებისგან მიშველაძე პასუხობს:
,,გამორჩეული იქნება იმით, რომ წამყვანი ჰყავს სხვა. თუმცა რომ გითხრათ გამორჩეული შტრიხი ექნება ნაკლებად. პირველი გადაცემისთვის სტუმრები უკვე შეთანხმებული გვყავს, მაგრამ მათ ვინაობას საიდუმლოდ დავტოვებ. ხვალ პირველი ოქტომბერია საპარლამენტო არჩევნებიდან ერთი წელი გადის და ამ თემიდან გამომდინარე მაყურებელს საინტერესო სტუმრებს შევთავაზებთ", -განაცხადა მიშველაძემ.
მისივე განმარტებით, ,,პირველი სტუდიის" აუდიტორიას შესაძლებლობა ექნება გადაცემის სტუმრებს ნებისმიერი შეკითხვა დაუსვას.
,, აუდიტორიის სტუმრებს შევარჩევთ ბალანსის მიხედვით, იგივე გენდერული, თუ პროფესიული ბალანსის მიხედვით, ასევე გვეყოლებიან, ექსპერტები, სამოქალაქო საზოგადოების წარმომადგენლები, რადგან მათი მოსაზრებები ძალიან მნიშვნელოვანია", _განაცხადა ეკა მიშველაძემ.