თბილისის მთავარანგელოზის სახელობის ეკლესიის წინამძღვარის დავით დათუაშვილის განცხადებით, საპატრიარქომ უკვე დააფიქსირა თავისი უარყოფითი დამოკიდებულება ID ბარათების მიმართ, თუმცა მიუხედავად ამისა, მთავრობას პოზიცია არ შეუცვლია და ალტერნატიული პირადობის დამადასტურებელი მოწმობები არ შემოუღია.

"საპატრიარქომ სთხოვა მთავრობას, რომ შესაძლებლობების ფარგლებში ალტერნატიული საბუთები დაშვებულიყო. ამას სამწუხაროდ, ტოვებენ როგორც მასმედიაში, ასევე ტოვებენ სხვადასხვა პირები, რომლებიც ამ თემაზე საუბრობენ ხოლმე,"- განაცხადა დავით დათუაშვილმა.

ცნობისთვის, დღეს თბილისის და ქუთაისის იუსტიციის სახლებთან პარალელურ რეჟიმში ID ბარათის აკრძალვის მოთხოვნით აქცია სახელწოდებით - „ID ბარათის აღებას სიკვდილი მირჩევნია" გაიმართა.

აქციაზე შეკრებილი მოქალაქეები საქართველოს იუსტიციის მინისტრს თეა წულუკიანს სპეციალური განცხადებით მიმართავენ და უწყებისგან ID ბარათების დამზადების ასაკრძალად 2 კვირიან ულტიმატუმს უყენებენ.

ამასთან, მომიტინგეები ID ბარათის იძულებით გაცემის შეჩერებასაც ითხოვენ და ხელისუფლებას მოუწოდებენ, უკიდურეს შემთხვევაში ID ბარათის აღება ნებაყოფლობითი იყოს.

იუსტიციის სახლთან მიმდინარე საპროტესტო აქციას სასულიერო პირები, მრევლი და „სახალხო მართლმადიდებლური მოძრაობის" საპრეზიდენტო კანდიდატი ლევან ჩიჩუაც დაესწრნენ.