,,NDI-ის შედეგებზე დათანხმება, რომ რეიტინგში ბაქრაძე ბურჯანაძეს უსწრებს არადამაჯერებელია", _განაცხადა ,,ჯი-ეიჩ-ენთან" საუბარში პოლიტოლოგმა რამაზ საყვარელიძემ ეროვნულ-დემოკრატიული ინსტიტუტის კვლევის შეფასებისას.
,,ნინო ბურჯანაძე და დავით ბაქრაძე ორივე პიროვნულად სიმპატიურია, მაგრამ ნათესავად ხომ არ ვირჩევთ, პრეზიდენტობა სურთ. მათ უკან დგას გარკვეული პოლიტიკური შინაარსი. ის შინაარსი, კი რაც ბაქრაძის უკან დგას ამაზე უარი მოსახლეობის 90% საპარლამენტო არჩევნებზე უკვე თქვა. ნინო ბურჯანაძის უკან ასეთი ნეგატიურობა არ არის. ამ ფონზე NDI-ის შედეგებზე დათანხმება, რომ რეიტინგში ბაქრაძე ბურჯანაძეს უსწრებს არადამაჯერებელია", _აცხადებს საყვარელიძე, რომელიც ,,ჯი-ეიჩ-ენის" შეკითხვას გაყალბებულია თუ არა ეროვნულ-დემოკრატიული ინსტიტუტის კვლევის შედეგები პასუხობს:
,, სასამართლო ტერმინებით ნუ აღვწერთ NDI-ის კვლევას, მაგრამ მათი შედეგები ტენდენციურობით ხასიათდება. გაიხსენეთ რა პროგნოზი ჰქონდათ საპარლამენტო არჩევნების წინ და რეალურად რა შედეგი მივიღეთ. პატიოსანი მკვლევარები ამგვარი ფიასკოს შემდეგ ჰორიზონტზე საერთოდ არ გამოჩნდებოდნენ, მაგრამ NDI ჯიუტია და ჩანან, მაგრამ ეს არ ნიშნავს, რომ უნდა ვენდოთ", - განაცხადა ,,ჯი-ეიჩ-ენთან" საუბარში საყვარელიძემ.
შეგახსენებთ, NDI-მ დღეს მედიის წარმომადგენლებს პოლიტიკური პარტიებისა და საპრეზიდენტო კანდიდატების რეიტინგები გააცნო. კვლების მიხედვით გამოკითხულთა 18% საქართველოს მომავალ პრეზიდენტად დავით ბაქრაძეს, ხოლო რესპონდენტთა 7% ნინო ბურჯანაძეს ისურვებდა. კვლევის საველე სამუშაოები 18 აგვისტოდან 3 სექტემბრის პერიოდში ჩატარდა. საქართველოს მასშტაბით პირისპირ ინტერვიუს წარმომადგელობითი შერჩევის საფუძველზე 3 838 ადამიანი გამოიკითხა. NDI-ის კვლევებს აფინანსებს შვედეთის საერთაშორისო განვითარების და თანამშრომლობის სააგენტო (Sida) და ატარებს კავკასიის კვლევითი რესურსების ცენტრი (CRRC).
მასალის გამოყენების პირობები