თბილისის საკრებულოს წევრი "ნაციონალური მოძრაობის" წარმომადგენლები მიიჩნევენ, რომ თბილისში ოკუპანტი ქვეყნის დედაქალაქის სახელობის ქუჩა არ უნდა არსებობდეს და მოსკოვის გამზირისთვის სახელწოდების შეცვლას მოითხოვენ.
საკრებულოს დეპუტატის თემურ გრიგალაშვილის განცხადებით, მოსკოვის გამზირს სოხუმის პროსპექტი უნდა ეწოდოს და პარალელურად, ქუჩის მიმდებარედ გმირთა ხეივანიც მოეწყოს.
"არსებული რეალობიდან გამომდინარე და ბოლო პერიოდში რუსი ოკუპანტების მხრიდან განსაკუთრებული ცინიზმით განხორციელებულმა ძალადობამ მიგვიყვანა იმ დასკვნამდე, რომ თბილისის ერთ-ერთ ყველაზე დიდ გამზირს არ შეიძლება ერქვას ოკუპანტი სახელმწიფოს დედაქალაქის სახელი. ჩვენ ვთავაზობთ საზოგადოებას და საკრებულოს უმრავლესობაში ჩვენს კოლეგებს, რომ მოსკოვის გამზირს სახელი გადაერქვას და ეწოდოს სოხუმის გამზირი,"- განაცხადა თემურ გრიგალაშვილმა.
"ნაციონალური მოძრაობის" აღნიშნულ ინიციატივას თბილისის საკრებულოს სახელდებისა და სიმბოლიკის კომისიის თავმჯდომარე, "ქართული ოცნების" წარმომადგენელი დეპუტატი ეთანხმება, თუმცა მიიჩნევს, რომ აღნიშნული ცვლილების სატელევიზიო ეთერით გაჟღერება არასწორია და ინიციატორებს ჯერ საკრებულოს შესაბამისი კომისიისთვის უნდა მიემართათ.
