საქართველოში ამერიკის შეერთებული შტატების ელჩის რიჩარდ ნორლანდის განცხადებით, პრეზიდენტ მიხეილ სააკაშვილის გაეროს გენერალური ასამბლეის რიგით 68-ე სესიაზე პრეზიდენტის რანგში სიტყვით ბოლოჯერ გამოსვლა საკმაოდ ძლიერი იყო.
ამერიკის ელჩის შეფასებით, სააკაშვილმა საქართველოსთვის ორ ძირითად და უმნიშვნელოვანეს საკითხზე - ოკუპირებული ცხინვალის რეგიონის მიმდებარე სოფლებში რუსი სამხედროების მიერ მავთულხლართების გავლების პროცესის განახლებასა და საქართველოს საგარეო პოლიტიკურ მისწრაფებებზე ამომურავად ისაუბრა.
"პრეზიდენტს საკმაოდ ძლიერი გამოსვლა ჰქონდა. განსაკუთრებით გამოვყოფდი ორ გარემოებას. პირველ რიგში, პრეზიდენტი შეშფოთებას გამოთქვამდა საზღვრის გავლების პროცესთან დაკავშირებით. ამის შესახებ მეც არაერთხელ გამიკეთებია კომენტარი. კიდევ ერთხელ გავიმეორებ, რომ საერთაშორისო თანამეგობრობა მხარს უჭერს საქართველოს ტერიტორიულ მთლიანობას და სუვერენიტეტს და გამოთქვამს იმედ, რომ ჟენევის მოლაპარაკებების პროცესში შესაძლებელი იქნება გამოინახოს გონივრული გამოსავალი. ასევე მნიშვნელოვანი იყო, რომ პრეზიდენტმა გამოსვლის ბოლოს, დასვებული შეცდომების შესახებაც გაამახვილა ყურადღება. ვფიქრობ, ეს სახელმწიფო ლიდერისგან მნიშვნელოვანი განცხადება იყო,"- განაცხადა რიჩარდ ნორლანდმა.
შეგახსენებთ, რომ გუშინ, ნიუ იორკის დროით 18:00 საათზე საქართველოს პრეზიდენტი მიხეილ სააკაშვილი გაეროს გენერალური ასამბლეის რიგით 68-ე სესიაზე სიტყვით გამოვიდა და ქვეყნის საგარეო და საშინაო პოლიტიკის საკითხებზე, ასევე საგარეო საფრთხეებზე და საქართველოსადმი რუსეთის დამოკიდებულებაზე ვრცლად ისაუბრა. მიხეილ სააკაშვილის სიტყვით გამოსვლისას რუსეთის ფედერაციის დელეგაციამ დარბაზი პროტესტის ნიშნად დატოვა.