"პრეზიდენტ სააკაშვილის გამოსვლა იყო აღსავსე საქართველოს ინტერესებზე ფიქრით, საქართველოს ინტერესების დაცვით,"- ამის შესახებ საპარლამენტო უმცირესობის წევრმა გიორგი კანდელაკმა საქართველოს პრეზიდენტის მიხეილ სააკაშვილის გაეროს გენერალური ასამბლეის რიგით 68-ე სესიაზე პრეზიდენტის რანგში ბოლოჯერ სიტყვით გამოსვლის შეფასებისას ისაუბრა.
"პრეზიდენტის გამოსვლაში მე მგონი, ძალიან მკაფიოდ და კარგად იყო გადმოცემული ერთი მარტივი ჭეშმარიტება, რომ დღევანდელი რუსეთის მმართველები ემტერებიან ზოგადად ძლიერი მთავრობის იდეას რუსეთის ნებისმიერ მეზობელში და მათ შორის რა თქმა უნდა, პირველ რიგში საქართველოში. სინამდვილეში, პიროვნებების როლი საქართველო-რუსეთის ცუდი ურთიერთობის კონტექსტში არის ძალიან გადაჭარბებული და სნამდვილეში ის, რასაც რუსეთი ემტერებოდა საქართველოში, ყოველთვის იყო, არის და იქნება წარმატებული სახელმწიფოებრიბა. ამიტომ, ჩვენს წარმატებულ სახელმწიფოებრიობაზე და ევროპულ მომავალზე ხელი არასოდეს არავითარ შემთხვევაში არ უნდა ავიღოთ,"- განაცხადა გიორგი კანდელაკმა.
შეგახსენებთ, რომ გუშინ, ნიუ იორკის დროით 18:00 საათზე საქართველოს პრეზიდენტი მიხეილ სააკაშვილი გაეროს გენერალური ასამბლეის რიგით 68-ე სესიაზე სიტყვით გამოვიდა და ქვეყნის საგარეო და საშინაო პოლიტიკის საკითხებზე, ასევე საგარეო საფრთხეებზე და საქართველოსადმი რუსეთის დამოკიდებულებაზე ვრცლად ისაუბრა. მიხეილ სააკაშვილის სიტყვით გამოსვლისას რუსეთის ფედერაციის დელეგაციამ დარბაზი პროტესტის ნიშნად დატოვა.
