საპარლამენტო უმრავლესობის წევრი ვიქტორ დოლიძე საქართველოს პრეზიდენტის მიხეილ სააკაშვილის გაერო-ს გენერალური ასამბლეის რიგით 68-ე სესიაზე სიტყვით გამოსვლას ექსპერტის ხილვებად მიიჩნევს.
დოლიძის შეფასებით, პრეზიდენტმა რამდენიმე მნიშვნელოვან საკითხზე ყურადღება არ გაამახვილა და ერთ-ერთი ასეთი საკითხი საქართველოს ახალი ხელისუფლების მიერ რუსეთთან ურთიერთობის დარეგულირებისთვის გადადგმული პოზიტიური ნაბიჯები და რუსეთის საპასუხო რეაქცია იყო.
"ბუნებრივია, ის რაც ახსენა რუსეთის აგრესიასთან მიმართებაში, ჩვენს მიერ გადადგმულ პოზიტიურ ნაბიჯებზე და უკან რასაც ვღებულობთ პასუხად, ესეც უნდა ეხსენებინა, მაგრამ მთლიანი გამოსვლა რაღაც ლირიული გადახვევებით და ფილოსოფიური ჩართვებით იყო რეგიონთან და რუსეთთან მიმართებაში. თავიდან ბოლომდე დრო დაუთმო იმპერიალიზმს, კოლონიებს და შემდგომ მისი მომავალი განვითარების რაღაც პერსპექტივებს თუ უპერსპექტივობას. ეს არ არის პრეზიდენტის გამოსვლა, ეს შეიძლება იყოს ექსპერტის რაღაცა ხილვები,"- განაცხადა ვიქტორ დოლიძემ.
შეგახსენებთ, რომ გუშინ, ნიუ იორკის დროით 18:00 საათზე საქართველოს პრეზიდენტი მიხეილ სააკაშვილი გაეროს გენერალური ასამბლეის რიგით 68-ე სესიაზე სიტყვით გამოვიდა და ქვეყნის საგარეო და საშინაო პოლიტიკის საკითხებზე, ასევე საგარეო საფრთხეებზე და საქართველოსადმი რუსეთის დამოკიდებულებაზე ვრცლად ისაუბრა. მიხეილ სააკაშვილის სიტყვით გამოსვლისას რუსეთის ფედერაციის დელეგაციამ დარბაზი პროტესტის ნიშნად დატოვა.
