26 სექტემბერს, 18:00 საათზე, საქართველოს სტრატეგიისა და საერთაშორისო ურთიერთობების კველვის ფონდში გაიმართება "პოლიტიკური პარტიების მხარდაჭერის პროგრამის" მეხუთე ნაკადის სწავლების დამთავრებისადმი მიძღვნილი საზეიმო ცერემონია.
"პოლიტიკური პარტიების მხარდაჭერის პროგრამა" არის ქართული პოლიტიკური ინსტიტუტების განვითარების ხელშეწყობის პროექტი, რომელსაც საქართველოს სტრატეგიისა და საერთაშორისო ურთიერთობების კვლევის ფონდი ახორციელებს საერთაშორისო რესპუბლიკურ ინსტიტუტთან ერთად, ამერიკის შეერთებული შტატების საერთაშორისო განვითარების სააგენტოს ფინანსური მხარდაჭერით. პროექტის ფარგლებში საქართველოს 17 პოლიტიკური პარტიის 36-მა წარმომადგენელმა გაიარა 6-თვიანი სასწავლო პროგრამა, რომელიც მოიცავდა პოლიტიკის ანალიზის, პოლიტიკური სოციოლოგიის, პოლიტიკური იდეოლოგიების, ეროვნული უსაფრთხოების, საქართველოს ეკონომიკის, ევროატლანტიკური ინტეგრაციის, საზოგადოებასთან ურთიერთობის სტრატეგიების და სხვა სასწავლო კურსებს.
პროექტის დახურვის ცერემონიაზე მოწვეული არიან საქართველოს მთავრობის, პოლიტიკური პარტიების, დიპლომატიური მისიებისა და საერთაშორისო ორგანიზაციების ლიდერები და წარმომადგენლები. ღონისძიებაზე სიტყვით გამოვა საქართველოს სტრატეგიისა და საერთაშორისო ურთიერთობების კვლევის ფონდის პრეზიდენტი ალექსანდრე რონდელი, ამერიკის შეერთებული შტატების საერთაშორისო განვითარების სააგენტოს კავკასიის მისიის დირექტორი სტივენ ჰეიკინი, მმართველობისა და დემოკრატიის ოფისის განყოფილების უფროსი დანიელე რიფი, საერთაშორისო რესპუბლიკური ინსტიტუტის ხელმძღვანელი საქართველოში ანდრეა კირბსი, ასევე _ პოლიტიკური პარტიების ლიდერები.