ორსულობის, მშობიარობისა და ბავშვის მოვლის გამო შვებულების დღეების რაოდენობა და შვებულების პერიოდზე გასაცემი ფულადი დახმარების ოდენობა იზრდება. საფინანსო-საბიუჯეტო კომიტეტმა „საქართველოს ორგანულ კანონში „საქართველოს შრომის კოდექსი" ცვლილებების შეტანის შესახებ" და „საჯარო სამსახურის შესახებ" საქართველოს კანონში ცვლილებების შეტანის თაობაზე" კანონპროექტები პირველი მოსმენით უკვე განიხილა.
ორსულობის, მშობიარობისა და ბავშვის მოვლის გამო შვებულება 477-დან 730 დღემდე იზრდება. ანაზღაურებადი დღეების რაოდენობა ნაცვლად 126 დღისა 183 დღით, გართულებული მშობიარობის ან ტყუპების შობის შემთხვევაში კი ნაცვლად 140 დღისა 200 კალენდარული დღით განისაზღვრება. შესაბამისად, განისაზღვრება ანაზღაურებადი შვებულების პერიოდზე გასაცემი ფულადი დახმარების ოდენობა და იგი ნაცვლად 600 ლარისა შეადგენს 1000 ლარს.
პარლამენტის წევრების, დიმიტრი ხუნდაძისა და მირიან წიკლაურის საკანონმდებლო ინიციატივას კომიტეტმა მხარი დაუჭირა.
