"ოფიციალურად თუ არაოფიციალურად რუსებს მოუხდებათ ჯარების გაყვანა მთელი კავკასიიდან და მათ მოუხდებათ ამ რეგიონის დატოვება მთლიანად,"- ამის შესახებ საქართველოს პრეზიდენტმა მიხეილ სააკაშვილმა ამერიკის შეერთებულ შტატებში ოფიციალური ვიზიტის ფარგლებში ნიუ იორკში მცხოვრებ ქართულ დიასპორასთან შეხვედრაზე ისაუბრა.
ქვეყნის პირველმა პირმა ძირითადი ყურადღება ტერიტორიული მთლიანობის და სუვერენიტეტის კუთხით საქართველოს საგარეო საფრთხეებსა და საგარეო პოლიტიკურ კურსთან დაკავშირებულ საკითხებზე გაამახვილა.
მიხეილ სააკაშვილმა საქართველოსა და სხვა ქვეყნების მიმართ რუსეთის აგრესიულ პოლიტიკასაც გაუსვა ხაზი და ქართული დიასპორის წარმომადგენელთა შეკითხვებს უპასუხა.
"ზუსტად ასევე ცდილობდნენ პოლონეთის სახელმწიფოს შესუსტებას საუკუნეების განმავლობაში, ზუსტად ასევე აიღეს 20-ე საუკუნეში ძალიან ბევრი ქვეყანა შიდა დივერსიების, პროვოკაციების და ყველანაირი მეთოდების გამოყენების გზით. ამიტომ, ის რაც საქართველოში ახლა ხდება, საერთოდ არ არის ახალი და უფრო მეტიც, საქართველოს აქვს ეს გამოცდილება ბევრ დამპყრობელთან, მაგრამ ჩვენ მთელი ამ საუკუნეების განმავლობაში რუსეთთან მიმართებაში ჩვენ უნდა მიგვეღო გამოცდილება რა ტიპის ძალასთან გვაქვს საქმე. ოფიციალურად თუ არაოფიციალურად მათ მოუხდებათ ჯარების გაყვანა მთელი კავკასიიდან და მათ მოუხდებათ ამ რეგიონის დატოვება მთლიანად. ეს არის პრინციპში აბსოლუტური გარდაუვალობა უახლოეს წლებში,"- განაცხადა მიხეილ სააკაშვილმა
