მიხეილ სააკაშვილი გაეროს გენერალური ასამბლეის რიგით 68-ე სესიაზე საქართველოს პრეზიდენტის რანგში დღეს ბოლოჯერ გამოვა.
პრეზიდენტის ადმინისტრაციის ინფორმაციით, სააკაშვილის სიტყვით გამოსვლისას საუბრის ძირითადი დრო ქვეყნის საგარეო საფრთხეებს და დიცსა და დვანში შექმნილ ვითარებას დაეთმობა.
ქვეყნის პირველი პირის თქმით, იგი მზად არის მისი გამოსვლის ტექსტი საგარეო საქმეთა სამინისტროსთან შეათანხმოს და უწყების შენიშვნები და რეკომენდაციები გაითვალისწინოს.
"ჩემი გამოსვლის ტექსტი წინასწარ ექნება საგარეო საქმეთა სამინისტროს და მათგან ყველანაირ რეკომენდაციებს მივიღებ და გახსნილი ვარ შენიშვნებისთვის. დღეს ჩვენ საგარეო საქმეთა მინისტრთან ერთად ვესწრებოდით პრეზიდენტ ობამას გამოსვლას. საწიროა კარგი კოორდინაცია. გვაქვს კარგი სამუშაო კონტაქტი, ერთად ვმუშაობთ არაღიარების თემაზე სხვათა შორის და აქაც ბევრი აზრთა გაცვლა-გამოცვლა იყო. ასე რომ, საგარეო საქმეთა სამინისტროში ჩამოყალიბდა ტრადიცია, რომ მიუხედავად პოლიტიკური რყევებისა, იქ არის ჯანსაღი სახელმწიფო აპარატი და ამიტომ, ვინც არ უნდა იყოს მომავალში პრეზიდენტი, ჩვენ ყველამ უნდა ვიმუშავოთ ერთად, იმიტომ, რომ საქმე ეხება საქართველოს გრძელვადიან ინტერესებს,"- განაცხადა მიხეილ სააკაშვილმა.
თავის მხრივ, რეკომენდაციები და შენიშვნები უკვე მზად აქვს საქართველოს საგარეო საქმეთა სამინისტროს. როგორც მაია ფანჯიკიძემ აღნიშნა, პრეზიდენტის სიტყვით გამოსვლისას სასაუბრო თემებში საქართველოს შიდა პოლიტიკური საკითხების შეყვანა არ არის მიზანშეწონილი და უმჯობესია დრო საგარეო პოლიტიკურ საკითხებს დაეთმოს.
"რადგან ბოლო გამოსვლაა მისთვის პრეზიდენტის რანგში, გარკვეულწილად უნდა შეაფასოს თავისი პრეზიდენტობის პერიოდი და მე იმედი მაქვს, რომ ეს შეფასება იქნება ობიექტური, თუმცა არ მგონია, რომ საშინაო პოლიტიკის საკითხები იყოს ამ მოხსენების შემადგენელი ნაწილი. ყოველ შემთხვევაში, ვფიქრობ, რომ ეს არ იქნებოდა მაინც და მაინც კარგი, თუკი საშინაო პოლიტიკა შევიდოდა მის მოხსენებაში. გაეროს გენერალური ასამბლეა არის ყველაზე მნიშვნელოვანი საერთშორისო ფორუმი, სადაც უნდა გააჟღერო სწორედ ის თემები, რომლებიც ქვეყნის საგარეო პოლიტიკისთვის არის მნიშვნელოვანი. ვფიქრობ, რომ ასეთი საკითხები უნდა შევიდეს პრეზიდენტის გამოსვლაში,"- განაცხადა მაია ფანჯიკიძემ.
გაეროს გენერალური ასამბლეის 68-ე სესიაზე მიხეილ სააკაშვილის სიტყვით გამოსვლა ნიუ იორკის დროით 18:00 საათზე იგეგმება.