"როგორც კი გვერდზე გადაგიცდება ფეხი, ეგრევე ჩაგწევენ ევროპის ბილიკიდან და აღმოჩნდები მოუსავლეთში,"- ასმის შესახებ საქართველოს პრეზიდენტმა მიხეილ სააკაშვილმა ლიტვის პრეზიდენტის დალია გრიბაუსკაუტეს მიერ საქართველოს საგარეო პოლიტიკურ კურსთან დაკავშირებით გაკეთებული განცხადების კომენტირებისას ისაუბრა.
"ამ რამდენიმე დღის წინ ლიტვის პრეზიდენტმა, რომელიც ჩვენი მეგობარია ტრადიციულად ქვეყანაც და პრეზიდენტი გრიბაუსკაუტე, რაღაცა მსგავსი თქვა - მოდი ახლა ვიბრძოლოთ უკრაინისთვის და მოლდოვასთვის და საქართველოს ევრაზიის კავშირშიც აქვს ინტერესი და ამიტომ, მოდით დანარჩენ 2 ქვეყანაზე გადავერთოთო. ეს ევროკავშირის პრეზიდენტის მხრიდან შემაშფოთებელი განცხადებაა ჩვენთვის. მე არ ვიცი ზუსტად პრემიერ-მინისტრმა რა ელაპარაკა ქალბატონ გრიბაუსკაუტეს, მაგრამ ჩვენ ჩვენს ევროპელ პარტნიორებს ვუხსნით, რომ ერთია პრემიერ-მინისტრი რას იტყვის ხოლმე და მეორეა ქართველი ხალხის ნება. ქართველი ხალხის ნებაა ევროპაში ინტეგრაცია და არავითარ შემთხვევაში არ უნდა მოხდეს მათი გადართვა - მოდით, იმათ მივხედოთო. რა თქმა უნდა, ქართველებს უკრაინელებსა და მოლდოველებზე არანაკლებ უნდათ ევროპაში და ბევრად მეტადაც შეიძლება უდოდეთ ბევრი ფაქტორის გათვალისწინებით. ამიტომ, ეს კიდევ ერთი მაგალითია, რომ აქეთ-იქეთ მივედ-მოვედოთ. ახლა როგორც კი მიედ-მოედები და სადღაც გვერდზე გადაგიცდება ფეხი, ეგრევე ჩაგწევენ იმ ბილიკიდან და აღმოჩნდები მოუსავლეთში,"- განაცხადა მიხეილ სააკაშვილმა.
ცნობისთვის, ლიტვის პრეზიდენტ დალია გრიბაუსკაიტეს განცხადებით, ''ევროკავშირი იბრძოლებს უკრაინისა და მოლდოვასთვის'', ხოლო რაც შეეხება საქართველოს, ის ორივე - ევროკავშირისა და ევრაზიული კავშირის ვარიანტით არის დაინტერესებული". ლიტვის პრეზიდენტის ეს განცხადება სტატიაში ''ევროკავშირი რუსეთის წინააღმდეგ'' ანალიტიკოს ამანდა პოლს მოჰყავს.
