თბილისის იუსტიციის სახლში სახელმწიფო ქონების ეროვნული სააგენტოს მომსახურების ცენტრი გაიხსნება. როგორც სახელმწიფო ქონების ეროვნული სააგენტოს ინფორმაციით, 25 სექტემბერს მომსახურების ცენტრს გახსნიან საქართველოს ეკონომიკისა და მდგრადი განვითარების მინისტრი გიორგი კვირიკაშვილი და მინისტრის პირველი მოადგილე, სახელმწიფო ქონების ეროვნული სააგენტოს თავმჯდომარე, დიმიტრი ქუმსიშვილი.
მომსახურების ცენტრის იუსტიციის სახლის სივრცეში გადატანის მთავარი მიზანია სერვისის ხარისხის ამაღლება, სწრაფი და კომფორტული მომსახურების გაწევა დაინტერესებულ პირთათვის და ინფორმაციის ხელმისაწვდომობის უზრუნველყოფა.
აღსანიშნავია, რომ სსიპ სახელმწიფო ქონების ეროვნული სააგენტო ახორციელებს სახელმწიფო ქონების პრივატიზებასთან, სარგებლობის უფლებით გადაცემასა და სახელმწიფოს წილობრივი მონაწილეობით შექმნილი საწარმოების მართვასთან დაკავშირებულ უფლებამოსილებებს და მზად არის განიხილოს თქვენი დაინტერესება და წინადადებები საპრივატიზაციო ობიექტებთან დაკავშირებით.
სახელმწიფო ფლობს ქონებას როგორც თბილისში, ასევე - საქართველოს სხვა ქალაქებსა და სოფლებში. ქვეყნის ინტერესებშია ამ ქონების გონივრული განკარგვა - პრივატიზება ან სარგებლობის უფლებით გადაცემა იმგვარად, რომ ხელი შეუწყოს არსებული რესურსის, ინფრასტრუქტურისა და ზოგადად - ეკონომიკის განვითარებას საქართველოში.
მასალის გამოყენების პირობები