საჯარო სკოლებში გამოსაშვები გამოცდები 12 ოქტომბრიდან დაიწყება და 4 საგანში (ფიზიკა, ქიმია, ბიოლოგია, გეოგრაფია) ცენტრალიზებულად, კომპიუტერზე ადაპტირებული ტესტირებით (CAT) ჩატარდება.
გამოცდების ეროვნული ცენტრის ინფორმაციით, პირველ საგამოცდო დღეს, 09:00 საათზე მეთორმეტეკლასელები გეოგრაფიის დავალებებზე დაიწყებენ მუშაობას. საგამოცდო პროცესში 2000-ზე მეტი მეთვალყურეა ჩართული.
გამოცდების დაწყებამდე ყველა მოსწავლე საკუთარ სკოლაში მიიღებს საგამოცდო ბარათს, რომელზეც მითითებულია 4-ვე გამოცდაზე გამოცხადების თარიღი და დრო.
მოსწავლე მითითებულ დღეს და საათზე უნდა გამოცხადდეს შესაბამის სკოლაში და გაიაროს რეგისტრაცია. მან თან უნდა იქონიოს საგამოცდო ბარათი, პირადობის მოწმობა და კალამი. დასაშვებია მხოლოდ პირადი ჰიგიენის ნივთებისა და პლასტმასის ბოთლით წყლის შეტანა.
2013 წლის სკოლის გამოსაშვები გამოცდები 12 ოქტომბერს - გეოგრაფიაში;
13 ოქტომბერს - ფიზიკაში; 14 ოქტომბერს - ბიოლოგიაში; 15 ოქტომბერს კი ქიმიაში ჩატარდება.
