"ჩვენი გადაცემა განსხვავებულ თემებზე იქნება ორიენტირებული. როდესაც საჭირო იქნება, ერთ-ერთზე დებატებიც გვექნება, თუმცა ზოგადად, მხოლოდ დებატების ფორმატი არ იქნება. შესაძლოა, გვქონდეს ერთი თემა, თუმცა ძირითადად ასე არ მოხდება, რადგან ყოველდღიური ეთერის პირობებში ერთი კონკრეტული მნიშვნელოვანი თემის ანალიზი არ მოგვიწევს. პირველი გადაცემის სტუმარი იუსტიციის მინისტრი თეა წულუკიანი იქნება. რაც შეეხება დარბაზში დამსწრე აუდიორიას, დარბაზში მაყურებელი არ გვეყოლება. მოგეხსენებათ ეთერში ყოველ საღამოს გავდივართ და საკმაოდ რთული იქნება ყოველდღიურ რეჟიმში მაყურებლის დარბაზში მოსვლა. ასევე, გამომდინარე თემების სიმწავავისა, არ მინდა მაყურებელი მხოლოდ ტაშის დამკვრელის ფუნქციით მყავდეს დარბაზში და მას მოსაზრების დაფიქსირების შესაძლებლობა არ მიეცეს, ამიტომ ამ ეტაპზე ასე გადავწყვიტეთ,"- განაცხადა ინგა გრიგოლიამ.

რაც შეეხება გადაცემის ქრონომეტრაჟს, წამყვანის თქმით, მისი ყოველდღიური პოლიტიკური თოქ-შოუსთვის 1 საათი და 20 წუთია განსაზღვრული, თუმცა განსახილველი თემებიდან გამომდინარე, გადაცემა შესაძლოა, გაცილებით მეტ ხანსაც გაგრძელდეს.

"ზოგადად 1 საათი და 20 წუთი გვაქვს, თუმცა თემებიდან გამომდინარე წინასწარ შეუძლებელია პროგნოზირება, შესაძლოა, ცოტა მეტ ხანსაც გავიგრძელდეს. მაგალითად დღეს, ვეჭვობ განსაზღვრულ დროში ჩავეტიოთ და ვფიქრობ, პირველი ეთერი განსაზღვრულ დროზე მეტ ხანს გაგრძელდება,"- აღნიშნა გრიგოლიამ და დასძინა, რომ გამომდინარე იქიდან, რომ TV-3 ახლადშექმნილი ტელევიზიაა, ჯერ-ჯერობით გადაცემის რეიტინგზე საუბარი ნაადრევია, რადგან არხს საზოგადოებაში ცნობადობა ჯერ არ აქვს.

"რაც შეეხება რეიტინგს, ჯერ არხს 0% აქვს და ტელევიზიის 0-დან შექმნა მიმდინარეობს, აქედან გამომდინარე, რეიტინგებზე საუბარი და რამის პროგნოზირება ჯერ სასაცილოა. ამაზე ლაპარაკი 6 - 8 თვის შემდეგ შეგვეძლება. ჯერ საინფორმაციო სამსახურიც ჩამოყალიბების პროცესშია და ყველაფერი კეთდება რათა კარგი ტელევიზია შეიქმნას. საინფორმაციო სამსახურს პროფესიონალი პროდიუსერი ვახო ხუზმიაშვილი შეემატა და შევეცდებით, ავკრიფოთ რეიტინგი. არ მინდა გადაცემაში გადაღეჭილი სტუმრები გვყავდეს და შევეცდებით, განსახვავებული სტუმრები მოვიწვიოთ. პირველ კვირაში არც ერთი საპრზიდენტო კანდიდატი არ გვეყოლება სტუმრად და გადაცემაში მათი მოწვევის საკითხს მომავალი კვირიდან დავგეგმავთ,"- განაცხადა ინგა გრიგოლიამ.

ამასთან, უკვე დაწყებულია TV-3-ის საინფორმაციო სამსახურის ფორმირებაც. არსებული ინფორმაციით, არხის საიფორმაციო სამსახურის მთავარ პროდიუსერად წლების განმავლობაში "საზოგადოებრივი მაუწყებლის" საინფორმაციო პროგრამა "მოამბეს" და ტელეკომპანია "მეცხრე არხის" ყოფილი პროდიუსერი ვახო ხუზმიაშვილი დაინიშნა, რომელიც არხის საინფორმაციო სამსახურის ახალი სახეებით დაკომპლექტებას უკვე შეუდგა. TV-3-ის საინფორმაციო სამსახურში მისი მისვლის შემდეგ საცდელ რეჟიმში მომუშავე არხის საინფორმაციო გამოშვება შეწყდა და იგი განახლებული ფორმატით ეთერში უახლოეს მომავალში გავა. .