დღეს, სოხუმის სახელმწიფო უნივერსიტეტში სასწავლო წლის დაწყებასთან დაკავშირებით, პირველკურსელებთან საზეიმო შეხვედრა გაიმართა.
ღონისძიებას საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი დავით დარახველიძე, საქართველოს განათლებისა და მეცნიერების მინისტრი თამარ სანიკიძე, აფხაზეთის ავტონომიური რესპუბლიკის მთავრობის თავმჯდომარე ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა გვაზავა და სხვა საპატიო სტუმრები ესწრებოდნენ.
„500 აბიტურიენტი შემოვიდა დღეს ამ უნივერსიტეტში, საიდანაც მხოლოდ 37 დევნილია. ერთის მხრივ, ეს ნიშნავს, რომ უნივერსიტეტის მნიშვნელობა მაღალია. თუმცა ის, რომ მხოლოდ 37 დევნილი აბიტურიენტია, მე ვფიქრობ, რომ არ არის კარგი. მეორეს მხრივ ეს აჩვენებს, რომ ძალიან უჭირთ დევნილ აბიტურიენტებს. ვისურვებდი, რომ უნივერსიტეტმა გამონახოს საშუალება იმისათვის, რომ იქნებ შეღავათი გაუკეთოს დევნილ სტუდენტებს" - განაცხადა მინისტრმა დავით დარახველიძემ.
მინისტრმა სტუდენტებთან გამოსვლა შემდეგი სიტყვებით დაასრულა: „მინდა დაგარწმუნოთ, რომ ის დღე, როდესაც ჩვენ ყველანი დავბრუნდებით აფხაზეთში, არც ისე შორსაა".
