დღეს, თბილისის იუსტიციის სახლში, გაეროს ეკონომიკური კომისიის მიწის ადმინისტრირების სამუშაო ჯგუფის (UNECE WPLA) ბიუროს სხდომა გაიმართა. ღონისძიებას იუსტიციის სამინისტროს საჯარო რეესტრის ეროვნული სააგენტო მასპინძლობს.
სხდომაზე, მიწის ადმინისტრირების სამუშაო ჯგუფის წევრებმა და ექსპერტებმა წლიური სამუშაო გეგმის ფარგლებში დაგეგმილ და მიმდინარე ღონისძიებებზე იმსჯელეს.
სამუშაო ჯგუფის წევრებთან შეხვედრაზე, საჯარო რეესტრის თავმჯდომარემ ეკატერინე კერესელიძემ აღნიშნა: „სააგენტოს სახელით, გვინდა გამოვხატოთ გულწრფელი მადლიერება იმ ფასდაუდებელი შრომისა და ძალისხმევისათვის, რასაც თქვენი ორგანიზაცია წლებია ახორციელებს.
მინდა გაცნობოთ, რომ 2013 წელს, საქართველოს მთავრობის ინიციატივით, შეიქმნა მიწის მართვის განვითარების სამართლებრივი უზრუნველყოფის უწყებათაშორისი საკოორდინაციო საბჭო, რომლის ძირითადი ამოცანებია: მიწის მართვის განვითარების საკანონმდებლო ბაზის სრულყოფა, მიწის პოლიტიკის შემუშავება და მის მართვასთან დაკავშირებული მნიშვნელოვანი საკითხების განხილვა, რაც ქვეყანაში მიწის ბაზრის განვითარებას და საკუთრების უფლების დაცვას შეუწყობს ხელს.
გამოვთქვამთ სურვილს - საქართველოში მიწის ადმინისტრირების არსებული სისტემის შესაფასებლად კვლევა გაეროს ეკონომიკური კომისიის მიწის ადმინისტრირების სამუშაო ჯგუფის ექსპერტების აქტიური მონაწილეობით ჩატარდეს. მზად ვართ მომავალშიც ვითანამშრომლოთ და გავითვალისწინოთ თქვენს მიერ დასმული პრინციპული მნიშვნელობის მქონე საკითხები და რეკომენდაციები, რაც მნიშვნელოვნად დაგვეხმარება ქვეყანაში მიწის მართვისა და ადმინისტრირების გასაუმჯობესებლად".
საქართველო, გაეროს ევროპის ეკონომიკური კომისიის მიწის ადმინისტრირების სამუშაო ჯგუფის წევრი 2002 წელს გახდა. ჯგუფის აქტიურად მუშაობს გარდამავალი ეკონომიკის მქონე ქვეყნებში მიწის ადმინისტრირების გაუმჯობესების, საკუთრების უფლების დაცვის, უძრავი ქონების ბაზრის განვითარებისა და რეგისტრაციის სისტემის მოდერნიზაციაზე . ამ მიზნით, 1999 წლიდან დღემდე, არაერთი ინსტრუქცია, წინადადება თუ რეკომენდაცია მოამზადა.
გაეროს ეკონომიკური კომისიის მიწის ადმინისტრირების სამუშაო ჯგუფი მუშაობას 24 სექტემბერს დაასრულებს.
