ხვალ, 19 სექტემბერს საჰაერო ძალებს 21 წელი უნდა შესრულებოდა. აღნიშნულთან დაკავშირებით საჰაერო ძალების ყოფილი სარდალი 2003-2005 წ.წ. ამირან სალუქვაძე განცხადებას ავრცელებს, რომელსაც ,,ჯი-ეიჩ-ენი" უცვლელად გთავაზობთ : ,,19 სექტემბერს საჰაერო ძალებს 21 წელი უნდა შესრულებოდა. სამწუხაროდ დღეს ასეთი სტრუქტურა აღარ არსებობს, რაც ჩემი მოსაზრებით, უარყოფითად აისახება ავიაციის და ჰაერსაწინაღმდეგო თავდაცვის გეგმიურ, გრძელვადიან განვითარებაზე. ამის მაგალითად ისიც შეიძლება მოვიყვანოთ, რომ შარშან ავიაციის შექმნის იუბილე - 20 წლისთავი არ აღნიშნულა. ეს საკითხი ცალკე განხილვის თემაა. დღეს კი ქართული ავიაციის შექმნის ისტორია გავიხსენოთ და რამდენიმე აქცენტი დავსვათ.ავიაციის დღედ 19 სექტემბრის გამოცხადება შემთხვევით არ მომხდარა. სწორედ ამ დღეს, 1992 წელს შედგა პირველი გაფრენა სუ-25 ტიპის თვითმფრინავით, რომელიც პოლკოვნიკმა იზანი ცერცვაძემ და ავიაციის გენერალ-მაიორმა ვალერი ნაყოფიამ განახორციელეს.
ქართული ავიაციის ისტორიას უფრო ღრმა ფესვები აქვს და 20-ე საუკუნის დასაწყისიდან იწყება. მსოფლიოს პირველ მფრინავთა შორის იყო პირველი ქართველი მფრინავი-კონსტრუქტორი ბესარიონ ქებურია. მან პირველი გაფრენა მის მიერ შექმნილი მონოპლანით 1908 წელს განახორციელა. პირველი ქართული სამხედრო საავიაციო ქვედანაყოფი კი 1918 წლის 20 აგვისტოს შეიქმნა. ქართველი მფრინავები იმ წლებში აქტიურად მონაწილეობდნენ საქართველოს დამოუკიდებლობისათვის წარმოებულ ბრძოლებში.
1992-93 წლების საომარ მოქმედებებში ქართველმა ავიატორებმა ღირსეული წვლილი შეიტანეს და გმირულად იბრძოლეს. მათი გმირობის დამადასტურებლად ისიც საკმარისია, რომ ამ ომს საჰაერო ძალების ორი სარდალი პოლკოვნიკი იზანი ცერცვაძე და გენერალი ზურაბ ნაირაშვილი შეეწირნენ. საქართველოს ერთიანობისათვის ომში გმირულად დაიღუპნენ: სლავა ჯაბუა, ზურაბ იარაჯული, ჯიმი მაისურაძე, აბაქარ მაგამედოვი, გიორგი კვესაძე, გიორგი ნოზაძე, გიორგი გელაშვილი, გიორგი ჭეიშვილი, ბეჟან გაბრიჩიძე, ვლადიმერ ქერდიყოვი, იგორ ბახტაძე, ლევან ჭაღოშვილი, როლანდ სენაშვილი, ტარიელ ჯალაღონია, ილიკო ეფრემიძე, სერგეი პლატოვსკი, ზეზვა ქავთარაძე, ვოვა ნაუმენკო, გელა სილაქაძე. დანაკარგები საჰაერო ძალებმა მშვიდობიან პერიოდშიც განიცადა და სხვადასხვა გარემოებებში 7 მფრინავი დაკარგა: დავით ცხოვრებაძე, ოლეგ ცატიაშვილი, ნუგზარ ცხოვრებოვი, ზურაბ ბუქვაიძე, გიორგი ლონდარიძე, სერგო ღვალაძე, გაგა ტყემალაძე.
2008 წლის რუსეთ-საქართველოს ომში საჰაერო ძალების მონაწილეობის მასალებზე ხელი არ მიმიწვდება, ამიტომ მხოლოდ იმას აღვნიშნავ, რაც გავრცელდა მედიის საშუალებით: მფრინავი შემადგენლობის დანაკარგები არ გვქონია, ოკუპანტების მიერ რამდენიმე საფრენი აპარატი აეროდრომებზე იქნა განადგურებული.
მ.წ. 9 სექტემბერს თბილავიამშენის ტერიტორიაზე თავდაცვის სამინისტრომ ამერიკაში მოღვაწე გამოჩენილი ქართველი ავიაკონსტრუქტორის ალექსანდრე ქართველიშვილის (ქართველის) დაბადების დღე აღნიშნა. ღონისძიება კი საავიაციო შოუთი დამშვენდდა. ასეთი ღონისძიებები ხელს უწყობს ავიაციის განვითარებას და პოპულარიზაციას.
დღეს ავიაციაში უამრავი პრობლემაა დაგროვილი, რომელთა გადაჭრას სახელმწიფოს მხრიდან დიდი ყურადღება ესაჭიროება. პირველ რიგში ვისურვებდი აღსდგეს საჰაერო ძალები და ისევ გაერთიანდეს მასში ავიაცია და ჰაერსაწინაღო თავდაცვა. ჰაერსაწინაღო თავდაცვა ხომ არმიის განვითარების ერთ-ერთ უმნიშვნელოვანეს პრიორიტეტად უნდა იქცეს.ნახევარ საუკუნეზე მეტია მსოფლიო ჩამოყალიბდა შეიარაღებული ძალების ასეთ სტრუქტურაზე: სახმელეთო კომპონენტი, საჰაერო კომპონენტი და საზღვაო კომპონენტი. სტატიის ფორმატი არ ითვალისწინებს ამ საკითხის სიღრმისეულ ანალიზს და დასაბუთებას. ადრე ვწერდით ამ თემაზე და შესაძლოა შემდგომშიც დავუბრუნდეთ. ცალკე სახეობად აღდგენის შემდეგ უნდა შედგეს ფართო მსჯელობა იმასთან დაკავშირებით, თუ როგორი ავიაცია გვესაჭიროება სამომავლოდ.
საქართველოს თავდაცვის სამინისტროს და შეიარაღებული ძალების ხელმძღვანელობას, საჰაერო ძალების ყოფილ სარდლებს, ყველა მფრინავს, შტურმანს და ინჟინერ-ტექნიკოსს, მთელ მოსახლეობას ვულოცავ ავიაციის დღეს და ვუსურვებ წარმატებებს და მიღწევებს ავიაციის განვითარების საქმეში, ასევე პირად ბედნიერებას და უსაფრთხო ფრენებს", _ნათქვამია განცხადებაში.
