გაერო-ს გენერალურმა ასამბლეამ ნიუ-იორკის დეკლარაცია დაამტკიცა, რომელიც პალესტინის სახელმწიფოს შექმნას ითვალისწინებს.
შესაბამის გადაწყვეტილებას ხმა მისცა გაერო-ს 193 წევრი სახელმწიფოდან 142-მა. ამის შესახებ ნათქვამია ორგანიზაციის ოფიციალური გვერდზე გამოქვეყნებულ ინფორმაციაში.
დეკლარაციას წინააღმდეგ ხმა მისცა ისრაელმა და კიდევ ცხრა ქვეყანამ - არგენტინამ, უნგრეთმა, მიკრონეზიამ, ნაურუმ, პალაუმ, პაპუა-ახალმა გვინეამ, პარაგვაიმ, ტონგამ და შეერთებულმა შტატებმა. თორმეტმა სახელმწიფომ თავი შეიკავა.
კენჭისყრამდე, გაერო-ში საფრანგეთის ელჩმა, ჟერომ ბონაფონმა, გაიხსენა, რომ ნიუ-იორკის დეკლარაცია „ორი სახელმწიფოს გადაწყვეტის რეალიზაციის ერთიან საგზაო რუკას ადგენს“.
საგზაო რუკა ღაზაში დაუყოვნებლივ ცეცხლის შეწყვეტას, დაკავებული ყველა მძევლის გათავისუფლებას და პალესტინის სახელმწიფოს, რომელიც სიცოცხლისუნარიანი და სუვერენულია, შექმნას ითვალისწინებს.
საგზაო რუკა ასევე ითვალისწინებს „ჰამასის“ განიარაღებას და ღაზაში მისი ხელისუფლებიდან ჩამოშორებას, ისრაელსა და არაბულ ქვეყნებს შორის ურთიერთობების ნორმალიზებას და კოლექტიური უსაფრთხოების გარანტიებს.
თავის მხრივ, ისრაელის ელჩმა გაერო-ში, დენი დანონმა აღნიშნა, რომ „დეკლარაცია არ დაამახსოვრდებათ, როგორც მშვიდობისკენ გადადგმული ნაბიჯი, არამედ მხოლოდ როგორც კიდევ ერთი ცარიელი ჟესტი, რომელიც ასუსტებს ამ ასამბლეის სანდოობას“.
