ეკონომიკისა და მდგრადი განვითარების სამინისტრო გიორგი კვირიკაშვილის რუსეთში ვიზიტის ფაქტს არ ადასტურებს. სამინისტროს მიერ გავრცელებულ განცხადებაში აღნიშნულია, რომ გიორგი კვირიკაშვილი რუსეთში არც სამუშაო და არც კერძო ვიზიტით არ იმყოფებოდა.
„13 სექტემბერს აჭარის საზოგადოებრივი მაუწყებლის ეთერით გადაიცა აჭარის ავტონომიური რესპუბლიკის მთავრობის მეთაურის არჩილ ხაბაძის ვრცელი ინტერვიუ, სადაც მან განაცხადა, რომ საქართველოს ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი "რამდენიმე კვირის წინ რუსეთში იმყოფებოდა".
ცალსახად გვინდა განვაცხადოთ, რომ საქართველოს ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი რუსეთში არც სამუშაო და არც კერძო ვიზიტით არ იმყოფებოდა.
შესაბამისად, ბატონი არჩილ ხაბაძის მიერ გაკეთებული განცხადება სიმართლეს არ შეესაბამება.
აჭარის მთავრობის მეთაურს, სავარაუდოდ, მხედველობაში ჰქონდა ის წარმატებული მოლაპარაკება, რომელიც საქართველოს ეკონომიკისა და მდგრადი განვითარების სამინისტროს სახმელეთო ტრანსპორტის სააგენტოს დელეგაციამ თავის რუს კოლეგებთან 2013 წლის 6-7 აგვისტოს გამართა. მოლაპარაკების შედეგად, საქართველოსა და რუსეთს შორის განახლდა 2006 წელს შეწყვეტილი საერთაშორისო საავტომობილო სატვირთო და სამგზავრო გადაზიდვები ქართული გადამზიდავი კომპანიებისთვის. მოლაპარაკება მოსკოვში ჩატარდა და საქართველოს დელეგაციას სახმელეთო ტრანსპორტის სააგენტოს უფროსი მიხეილ ხმალაძე ხელმძღვანელობდა.
დეტალური ინფორმაცია როგორც უშუალოდ მოლაპარაკების, ისე მისი წარმატებული შედეგების შესახებ განთავსებულია საქართველოს ეკონომიკისა და მდგრადი განვითარების სამინისტროს ოფიციალურ ვებგვერდზე. სათანადო ინფორმაცია თავის დროზე ასევე გავრცელდა საქართველოსა და უცხოეთის მედია-საშუალებებით. სამწუხაროდ, ბატონი არჩილ ხაბაძის მიერ უნებლიედ დაშვებული შეცდომა ცალკეული მედია საშუალებების წარმომადგენლებმა არაპროფესიონალურად გამოიყენეს და სიცრუით გაჯერებული თეორიები ააგეს ", - ნათქვამია სამინისტროს მიერ გავრცელებულ განცხადებაში.
შეგახსენებთ, რომ აჭარის მთავრობის მეთაურმა არჩილ ხაბაძემ, აჭარის ტელევიზიით ეთერში, გადაცემა „სამართალი ხალხისთვის" აჭარიდან ციტრუსის ექსპორტზე საუბრისას განაცხადა, ეკონომიკისა და მდგრადი განვითარების მინისტრი გიორგი კვირიკაშვილი მოსკოვში უკვე იმყოფებოდა და რუსეთის დედაქალაქში მალე სოფლის მეურნეობის მინისტრი შალვა ფიფიაც ჩავა.
„ყაზბეგის" გამშვები პუნქტი გაიხსნა, გზები კეთდება და გვინდა, რომ ზამთრისთვის მზად იყოს. ბატონი გიორგი კვირიკაშვილი რამდენიმე კვირის წინ რუსეთში იმყოფებოდა. შესაბამის სამსახურებთან მოხდა შეთანხმება და თუ არ ვცდები 10 მანქანის გატანის პრობლემა არ გვაქვს. გაადვილებული რეჟიმი იქნება სატვირთო ავტომობილების გატარების. ეს ერთი ნაწილია. მალე შალვა ფიფია უკრაინაში იქნება და მერე იქედან რუსეთშიც ექნება ვიზიტი, რათა დავალაგოთ ციტრუსის გატანის საკითხები. თუმცა მარტო ციტრუსზე არაა საუბარი. მალე რთველი მოდის და ამაზე მიდის მზადება, მერე ციტრუსის სეზონი დაიწყება", - განაცხადა არჩილ ხაბაძემ.
