იაპონიაში საერთაშორისო ტურისტული გამოფენა-ბაზრობზე JATA World Tourism Forum and Travel Showcase ოფიციალურად გაიხსნა, რომელშიც საქართველოს ტურიზმის ეროვნული ადმინისტრაციაც იღებს მონაწილეობას. როგორც ტურიზმის ეროვნულ ადმინისტრაციაში განმარტავენ, ღონისძიებას ესწრება საქართველოს სრულუფლებიანი ელჩი იაპონიაში რევაზ ბეშიძე. აღნიშნული გამოფენა 15 სექტემბრამდე გაგრძელდება.
JATA World Tourism Forum and Travel Showcase, ყველაზე დიდი ფორუმია აღმოსავლეთის ტურისტულ ბაზარზე. იაპონელი ტურისტები ერთ-ერთი ყველაზე მაღალშემოსავლიან სეგმენტად ხასიათდებიან. აღსანიშნავია რომ ქართული ტურისტული კომპანიების მხრიდანაც საკმაოდ დიდი დაინტერესებაა იაპონიის ბაზრის მიმართ. სტატისტიკური მონაცემების თანახმად, 2011 წლიდან 2012 წლამდე იაპონიიდან დაფიქსირდა ტურისტების 41 %- იანი ზრდა. საქართველოს სტენდზე წარმოდგენილია 6 ქართული ტურისტული კომპანია: „თიკა ტურსი", „კაუკაზუს თრეველი", „ვიზიტ ჯორჯია", „ჯეორჯიკა თრეველი", „კონკორდ თრეველი". მონაწილე კომპანიები გამოფენის ფარგლებში მართავენ შეხვედრებს პარტნიორ ორგანიზაციებთან.
გამოფენა JATA World Tourism Forum and Travel Showcase, 10 წელზე მეტია რაც ტარდება და მასში მონაწილეობის მსურველთა რაოდენობა ყოველწლიურად იზრდება. ბოლო წლებში აღნიშნული გამოფენა ერთ-ერთი ყველაზე მასშტაბური და ცნობილი გახდა, რის საფუძველზეც გაიზარდა როგორც მონაწილეების ასევე ვიზიტორთა ინტერესი. რადგან ჩვენი ქვეყნისათვის იაპონია მნიშვნელოვან ბაზარს წარმოადგენს, საქართველო უკვე მრავალი წელია მონაწილეობს JATA World Tourism Forum and Travel Showcase.
წელს საქართველოს ტურიზმის ეროვნული ადმინისტრაცია გამოფენაზე წარსდგა განახლებული სტენდის დიზაინითა და საპრომოციო მასალებით.
გახსნის ცერემონიის შემდეგ JATA-ს ორგანიზებით გაიმართება B2B შეხვედრები. რომლის დასრულებისთანავე ტურიზმის ეროვნული ადმინისტრაციის ხელმძღვანელი გიორგი სიგუა საქართველოს შესახებ რამოდენიმე პრეზენტაციას გამართავს. 14-15 სექტემბერს გამოფენა გაიხსნება ყველა მსურველისათვის. საქართველოს სტენდს ეწვევიან დაინტერესებული პირები, რომლებსაც საქართველოს ტურისტული პოტენციალის შესახებ ინფორმაციის ინდივიდუალურად მიღების შესაძლებლობა ექნებათ.
JATA World Forum Tourism and Travel Showcase 2013- ში საქართველოს ტურიზმის ეროვნული ადმინისტრაციის მონაწილეობის მიღება არის ერთ-ერთი საუკეთესო მარკეტინგული კამპანია, რადგანაც საქართველოს ცნობადობა იაპონიაში ამ ეტაპისთვის არც თუ ისე მაღალია. მსგავსი ტიპის აქტივობები ხელს შეუწყობს საქართველოს პოპულარიზაციას აღმოსავლეთის ტურისტულ ბაზარზე.