თავისუფალი და სამართლიანი არჩევნებისათვის უწყებათაშორისი კომისიის თავმჯდომარე თეა წულუკიანი, კომისიის რამდენიმე წევრთან ერთად ბოლნისის გამგეობას ესტუმრა და იქ შექმნილ ვითარებას ადგილზე გაეცნო.
აღსანიშნავია, რომ ბოლო პერიოდში ბოლნისის საკრებულოს წევრებს შორის არსებობს უთანხმოება, რომლის შესახებაც კომისიის სხდომაზე საკითხი რამდენჯერმე დაისვა. ადგილზე თეა წულუკიანი პირისპირ შეხვდა ახალ გამგებელ ალექსანდრა ობოლაძესა და საკრებულოს ყველა წევრს.
საკრებულოს წევრებთან შეხვედრისას იუსტიციის მინისტრმა - უწყებათაშორისი კომისიის თავმჯდომარემ - თეა წულუკიანმა დაპირისპირებულ მხარეებს ქვეყნის სამსახურში ჩადგომისკენ მოუწოდა და აღნიშნა, რომ ისინი არიან ხალხის არჩეული და უნდა ემსახურონ ბოლნისში მცხოვრებ როგორც ქართველებს, ისე ეთნიკურ აზერბაიჯანელებს. მინისტრის თქმით, გაუგებრობები საზიანოა როგორც თავად ბოლნისისთვის, ისე, ზოგადად, ქვეყნისთვის.
„უწყებათაშორისი კომისია აქ ჩამოვიდა იმისათვის, რომ მოგვესმინა ადგილზე არსებული პრობლემები. ჩვენ გვაქვს კარგი ამბავი და ეს გახლავთ ის, რომ საკრებულოს წევრებთან საუბრის შემდეგ მე მაქვს იმედი, რომ ისინი ერთად გააგრძელებენ მუშაობას და ყოველგვარი დაპირისპირება ბოლნისში ამოწურული იქნება. ეს აუცილებელია იმისათვის, რომ მომავალი საპრეზიდენტო არჩევნები თავისუფალ და სამართლიან გარემოში ჩატარდეს. უფრო მიგვიანებით კი, თვითონ ადგილობრივ თვითმმართველობის არჩევნებში მოსახლეობას საშუალება ჰქოდეს დამოუკიდებელი არჩევანი გააკეთოს", - განაცხადა თეა წულუკიანმა.
მისივე თქმით, საკრებულოს ყოფილ თავმჯდომარე მალხაზ ერაძესთან დაკავშირებით თუკი არსებობდა რაიმე დარღვევა, ეს სასამართლოში გაირკვევა, რასაც თავად მალხაზ ერაძეც ეთანხმება. მან რამდენიმე დღის წინ იუსტიციის მინისტრის სახელზე განცხადება შეიტანა, რომელსაც, როგორც თავად თეა წულუკიანი აცხადებს, პირადად შეისწავლის.
