იაშვილის სახელობის კლინიკის თანამშრომლები სამედიცინო დაწესებულების ახალი მმართველის მიერ საავადმყოფოს პალატებში ხატების ჩამოხსნის ბრძანების გაცემას აპროტესტებენ. ამასთან, როგორც დღეს იაშვილის კლინიკასთან ქვეყნის მასშტაბით 5 სამედიცინო დაწესებულების წარმომადგენელი მედპერსონალის ერთობლივ საპროტესტო აქციაზე აღნიშნეს, კომპანიის ახალი ინვესტორის წარმომადგენელი სამსახურში მუდმივად არაფხიზელ მდგომარეობაში მყოფი ცხადდება და ექიმებს სიტყვიერ და ფიზიკურ შეურაცხყოფას აყენებს.
"კომპანიის ახალმა ხელმძღვანელმა თექინ ატაკმა კაბინეტებიდან ხატების გატანა მოითხოვა, ექიმებს სიტყვიერი შეურაცხოფა მიაყენა და აპარატურა დაამტვრია. ასევე, კულმინაცია იყო შაბათის ინციდენტი, როდესაც მან ექიმს კლინიკის რეანიმაციულ განყოფილებაში შემოყვანილი პაციენტის მიხედვის საშუალება არ მისცა,"- განაცხადა იაშვილის კლინიკის ერთ-ერთმა ექიმმა.
იაშვილის სახელობის კლინიკასთან შეკრებილი მომიტინგე მედიკოსების ბრალდებებს ინვესტორი კომპანიის წარმომადგენელი თექინ ატაკი გამოეხმაურა და აღნიშნა, რომ სამედიცინო პერსონალის განცხადებები სიმართლეს არ შეესაბამება, რაც შეეხება პალატებში ხატების მოხსნის საითხს, ეს ბრძანება ნამდვილად გასცა, თუმცა გამოვიდა ინიციატივით, რომ საავადმყოფოს ყველა სართულზე სამლოცველოსთვის ცალკე ტერიტორია გამოიყოს.
"ფიზიკურ დაპირისპირებას ადგილი არ ჰაქონია. შაბათს ერთ-ერთი პაციენტი მომსახურებით უკმაყოფილო იყო, რაც მე არ მომეწონა და ექიმს სიტყვიერი შენიშვნა მივეცი. ვადასტურებ, რომ კომპიუტერს დავარტყი ხელი, მაგრამ ექიმებისთვის ფიზიკური შეურაცხყოფა არ მიმიყენებია. რაც შეეხება ხატების ჩამოხსნას, მე მოვითხოვე, რომ თითო სართულზე მხოლოდ ერთი დიდი სამლოცველო გაგვეკეთებინა. მზად ვარ შევხვდე ჯანდაცვის სამინისტროს წარმომადგენლებს და ყველა დეტალზე მათთან ვისაუბრო,"- განაცხადა თექინ ატაკმა.
ამასთან, იაშვილის სახელობის საავადმყოფოსთან დღეს შეკრებილმა მომიტინგე მედიკოსებმა აღნიშნული კლინიკის სახელმწიფოს ბალანსზე გადაყვანა და მისთვის რეფერალური კლინიკის სახელწოდების მინიჭება მოითხოვეს.
