1-3 სექტემბერს, ბათუმში საერთაშორისო ფესტივალი „INTER ART BATUMI 2013" გაიმართება. ბათუმის მერიაში აცხადებენ, რომ ხელოვნების ფესტივალი ბათუმში უკვე მეორედ იმართება და მასში ქართველი და ევროპელი ხელოვანები მონაწილეობენ.
ღონისძიების ფარგლებში მოეწყობა „მასტერ კლასები", რომელსაც ხელოვნების საერთაშორისო ექსპერტები წარუძღვებიან. დაგეგმილია ქართული ტრადიციული პროდუქციის გამოფენა, მოეწყობა საქველმოქმედო გალაკონცერტი. ფესტივალის მონაწილეები საქართველოს სხვადასხვა კუთხეში გაეცნობიან ქართულ სამზარეულოს, ეწვევიან ქართული ღვინის ცნობილ მარნებს, მუზეუმებს, სამხატვრო გალერეებს.
პროექტის ორგანიზატორები არიან საერთაშორისო ხელოვნებისა და კულტურის ცენტრი „ინტერ არტ ჯორჯია" და საერთაშორისო ხელოვნების ფესტივალი „არტე მარბეა". ოფიციალური მხარდამჭერები - ქ. ბათუმის მერია, ქართული კულტურის ცენტრი „EUROGEORGIA'' და მისი ოფიციალური წარმომადგენელი საქართველოში კომპანია „VIPR", საქართველოს სავაჭრო პალატის წარმომადგენლობა ანდალუზიაში, ესპანეთის ბიზნესმენ ქალთა ასოციაცია „WOMEN IN BUSINESS SPAIN, MARBELLA WINE WAREHOUSE", თბილისის სახელმწიფო სამხტავრო აკადემია და საქართველოს სახელმწიფო მინისტრის აპარატი დიასპორის საკითხებში.