1-ელ სექტემბერს 21:00 საათზე ბათუმელებსა და მის სტუმრებს, პიაცას მოედანზე, დაუვიწყარი სანახაობა ელოდებათ. როგორც აჭარის ტურიზმის დეპარტამენტში განმარტავენ, „ბათუმობა 2013"-ის ფარგლებში მოეწყობა ფოლკლორული მუსიკის საღამო, რომელშიც სხვადასხვა ქორეოგრაფიულ ანსამბლთან ერთად მონაწილეობას მიიღებს უხუცესთა ანსამბლი "ბერმუხა".
„ტურისტებისათვის საღამოს დაუვიწყარს გახდის წამყვანი, რომელიც ამავდროულად შეითავსებს ქართული სუფრის თამადის როლს და უცხოელებს ქართული ადათ-წესებისა და სადღეგრძელოების შესახებ მოუყვება. თამადა სცენაზე მიიწვევს ქართული ცეკვის-განდაგანის შესწავლის მსურველებს. ცეკვის გამამხნევებელი გაკვეთილების შემდეგ ილეთების საუკეთესოდ შემსრულებლები დაჯილდოვდებიან პრიზებით - ჩონგურით, ფანდურით, დოლით, სალამურით, სვანური ქუდით და ქართული ღვინით. აქვე გაიმართება ქართული ღვინის დეგუსტაცია - გამოფენა-გაყიდვა.
უცხოელი სტუმრები ყოველთვის განსაკუთრებულ ინტერესს იჩენენ ჩვენი ტრადიციებისა და კულტურისადმი. ამიტომაც 1 სექტემბრის საღამო შესანიშნავი შანსია ყველასათვის უფასოდ დაესწრონ და გაეცნონ რეგიონის ადათ-წესებსა და ფოლკლორს"- აცხადებენ აჭარის ტურიზმის დეპარტამენტში.