ცენტრალურმა საარჩევნო კომისიამ, საქართველოს პრეზიდენტის 2013 წლის 27 ოქტომბრის მორიგი არჩევნებისათვის საუბნო და საოლქო საარჩევნო კომისიის წევრთა სახელმძღვანელო ინსტრუქციები დაამტკიცა.
კომისიამ, საქართველოს პრეზიდენტის 2013 წლის 27 ოქტომბრის მორიგი არჩევნებისათვის ,,ზოგიერთი საარჩევნო ღონისძიების განსაზღვრის თაობაზე" და ,,ევროკავშირის წევრი ქვეყნის მოქალაქეების მონაწილეობის წესის განსაზღვრის შესახებ" დადგენილებებში ცვლილებები შეიტანა; ასევე, ცვლილება შევიდა ,,საუბნო საარჩევნო კომისიის რეგლამენტის დამტკიცების თაობაზე" დადგენილებაში, ხოლო დადგენილებაში -,,საოლქო საარჩევნო კომისიის რეგლამენტის დამტკიცების თაობაზე" კომისიამ დამატება შეიტანა.
კომისიის გადაწყვეტილებით, განკარგულებებში - „საქართველოს პრეზიდენტის 2013 წლის 27 ოქტომბრის მორიგი არჩევნების საარჩევნო ღონისძიებათა გრაფიკის დამტკიცების თაობაზე" და ,,პატიმრობის/თავისუფლების აღკვეთის დაწესებულებაში ხმის მიცემის უფლების მქონე პატიმრების ინფორმირების პირობებისა და წესის განსაზღვრის შესახებ" ცვლილებები და დამატებები შევიდა.
კომისიამ განსაზღვრა საზღვარგარეთ დისლოცირებულ საქართველოს შეიარაღებულ ნაწილებში - ავღანეთში განლაგებული საქართველოს შეარაღებული ძალების სამშვიდობო ბატალიონებში მოსამსახურე საქართველოს მოქალაქეების 2013 წლის 27 ოქტომბრის მორიგ საპრეზიდენტო არჩევნებში მონაწილეობის უზრუნველყოფისა და მათი საყოველთაო საარჩევნო უფლების რეალიზების მიზნით, საარჩევნო უბნების, სპეციალური ჯგუფების შექმნის, მათი შემადგენლობის, კენჭისყრის ვადების და კენჭისყრის შედეგების შეჯამების წესი.
საქართველოს პრეზიდენტის 2013 წლის ოქტომბრის არჩევნებისათვის საერთაშორისო დამკვირვებელ ორგანიზაციად საქართველოში შვეიცარიის საელჩო დარეგისტრირდა.
საქართველოს პრეზიდენტის 2013 წლის 27 ოქტომბრის არჩევნებისათვის, საარჩევნო რეგისტრაცია გაუუქმდა ამომრჩეველთა საინიციატივო ჯგუფს შემადგენლობით: ილია მხეიძე, ნინო გადახაბაძე, ამირან მახარაძე, თეიმურაზ დუმბაძე და ციცინო ნინუა. საინიციატივო ჯგუფის წარმომადგენელს ილია მხეიძეს კი შეუწყდა უფლებამოსილება ყველა საარჩევნო კომისიაში.
დღესვე კომისიამ, №25 წალკის საოლქო კომისიის დროებით წევრად ზურაბ ჭავჭანიძე აირჩია.
კომისიამ, უსაფუძვლობის გამო არ დააკმაყოფილა 2013 წლის 14 აგვისტოს ჩატარებული სასერტიფიკაციო გამოცდის მონაწილის ხათუნა ხათაშვილის მოთხოვნა. ხ.ხათაშვილი ითხოვდა ტექნიკური შეცდომის გამო დაფიქსირებული არასწორი პასუხის ჩათვლას სწორ პასუხად.
საქართველოს პრეზიდენტის 2013 წლის არჩევნებისათვის ხელახალი კონკურსი გამოცხადდა №30 კასპის საოლქო საარჩევნო კომისიის დროებითი წევრის ვაკანტური ადგილის დასაკავებლად. საბუთები ცენტრალურ საარჩევნო კომისიაში 2013 წლის 24 - 25 აგვისტოს მიიღება (მის.: ქ. თბილისი, დ. აღმაშენებლის ხეივანი მე-13 კმ.)