ტელეკომპანია "მეცხრე არხის" შესყიდვის მსურველმა საინიციატივო ჯგუფის წევრებმა საქართველოს მთავრობის კანცელარიაში პრემიერ-მინისტრ ბიძინა ივანიშვილის სახელზე მიმართვა შეიტანეს.
საინიციატივო ჯგუფი ბიძინა ივანიშვილს მისივე განცხადების საფუძველზე საინფორმაციო სააგენტო "ინფო 9"-სა და ტელეკომპანია "მეცხრე არხის" გადარჩენას სთხოვს და ამ მიზნით ისინი პრემიერს ტელევიზიის და სააგენტოს საზოგადოებისთვის გადაცემას სთავაზობენ.
მათივე თქმით, საზოგადოების აქტიური ნაწილი დაინტერესებულია შექმნას სააქციო საზოგადოება, რომელიც გაყიდვის შემთხვევაში, აღნიშნულ მედიასაშუალებებს შეისყიდის.
"პრემიერმა არაერთხელ განაცხადა, რომ მისი ოჯახი აპირებს დახუროს ტელევიზია, მაგრამ შესაძლებელია, ტელევიზია მესამედ ფასში გაიყიდოს თუ პირველ სექტემბრამდე მყიდველი გამოჩნდება, რომელიც ჟურნალისტებს სამუშაო ადგილს შეუნარჩუნებს. ჩვენ მაშინ გადავწყვიტეთ, რომ რაკი ჯერ კიდევ არის ცოტა დრო, შესაძლებელია საზოგადოების აქტიური ნაწილი იყოს დაინტერესებული შექმნას სააქციო საზოგადოება, რომელიც იყიდს ტელეკომპანიას თუკი პრემიერის ოჯახი მის გაყდვას აპირებს,"- განაცხადა ია ანთაძემ.
საინიციატივო ჯგუფის წევრებმა მთავრობის კანცელარიაში ბიძინა ივანიშვილის სახელზე შეტანილ დოკუმენტს 4 000-ზე მეტი ადამიანის ხელმოწერაც დაურთეს.
შეგახსენებთ, საქართველოს პრემიერ-მინისტრ ბიძინა ივანიშვილის განცახდებით, თუ მიმდინარე წლის პირველ სექტემბრამდე ტელეკომპანია "მეცხრე არხის" და საინფორმაციო სააგენტო "ინფო 9"-ის საბაზრო ღირებულებაზე 3-ჯერ ნაკლებ ფასად მყიდველი არ გამოჩნდება, ივანიშვილების ოჯახი აღნიშნულ მედიასაშუალებებს დახურავს.
