"დღეს "მეცხრე არხზე" ბოლო საინფორმაციო გამოშვება გავა,"- ამის შესახებ ტელეკომპანია "მეცხრე არხის" გენერალურმა დირექტორმა ლუბა ელიაშვილმა საინფორმაციო სააგენტო "ინფო 9"-სთვის მიცემულ ინტერვიუში ისაუბრა.
რაც შეეხება სააგენტო "ინფო 9"-ს, ელიაშვილის თქმით, იგი პირველ სექტემბრამდე გააგრძელებს მუშაობას.
"ალბათ დღეს 21:00 საათზე არხი დაემშვიდობება მაყურებელს და დავხურავთ არხს. როგორც ვიცი, "ინფო 9" პირელ სექტემბრამდე გააგრძელებს მუშაობას და მიხარია, იმიტომ რომ, შემოვალ ხოლმე და აუცილებლად შევხედავ ჩემს საყვარელ საიტს. პრემიერის განცხადებაში ნათქვამია, თუ გამოჩნდა მყიდველი,რომ იგი მზადაა, ეს ყველაფერი მესამედ ფასში მისცეს თუ ახალი მეპატრონე თანამშრომლებს შეინარჩუნებს და როგორც იცით, არხში ცოტა თანხა არ არის დახარჯული. ჩემი აზრით, მისი სურვილია, რომ აქ მომსახურე ადამიანებს ანგარიში გაუწიოს. მან ასევე ისიც თქვა, მეც მომსწრე ვარ ამის და ეს "მეცხრე არხელებმაც" იცოდნენ, რომ 10 თვის განმავლობაში იგი ეძებდა მყიდველს და ამ ხნის განმავლობაში ჩვენ ყველაფერი დროულად გვქონდა. დროულად გვქონდა ხელფასიც, დროულად გვქონდა მივლინებაც და ყველა სამუშაო პირობა შექმნილი. ყველაზე მთავარი, რაც ამ ურთიერთობაში იყო, იყო ის, რომ იგი არასოდეს სარედაქციო პოლიტიკაში არ ერეოდა. დამფუძნებლები ამ არხის სარედაქციო პოლიტიკაში არასოდეს ერეოდნენ, რაც ჩემთვის განსაკუთრებით ძვირფასი იყო,"- განაცხადა ლუბა ელიაშვილმა.
"მეცხრე არხის" გენერალური დირექტორის თქმით, "იგი ცოტა გულნატკენია იმ ორგანიზაციებზე, რომლებიც არნიშნულ ტელეკომპანიაში გულმოდგინედ ეძებდნენ არაობიექტურობას".
"ჩვენი მაყურებელი აბსოლუტურად იზიარებს იმ მოსაზრებას, რომ "მეცხრე არხი" ძალიან ობიექტური იყო. მე ძალიან ბევრისგან მსმენია ეს და ბევრჯერ მოუწერიათ ეს ამბავი. მინდა ყველა "მეცხრე არხელს" ვუთხრა, რომ მე ბედნიერი, ვარ, რომ ასეთ კარგ არხზე ასეთ კარგ და პროფესიონალ ადამიანებთან მომიწია მუშაობა. მე თუ მკითხავთ, ეს ყელაზე კარგი არხი იყო, რაც აქამდე ყოფილა საქართველოში," - აღნიშნა ელიაშვილმა.
