"მეცხრე არხის" თანამშრომლებს დღეიდან პირველ სექტემბრამდე სამსახურში ნებაყოფლობით მისვლის უფლება აქვთ. ამის შესახებ ტელეკომპანიაში ცოტა ხნის წინ ჩატარებული თათბირის შემდეგ გახდა ცნობილი.
ამ წუთებში ბელიაშვილის ქუჩაზე არხის მთავარ შენობასთან ტელეკომპანიის ყველა თანამშრომელი იკრიბება და ადგილზე მიიღება გადაწყვეტილებას გააგრძელებენ თუ არა ისინი პირველ სექტემბრამდე ტელეკომპანია "მეცხრე არხზე" მუშაობას.
"გენერალურმა დირექტორმა თათბირი ჩაატარა და ჟურნალისტებს გამოუცხადა, რომ ათი დღის განმავლობაში არხი მუშაობას აგრძელებს და ჟურნალისტებმა თვითონ უნდა გადაწყვიტონ იმუშავებენ თუ არა,"- განაცხადა "მეცხრე არხის" საინფორმაციო გამოშვების წამყვანმა ნოდარ ჩაჩუამ.
"მეცხრე არხის" განვითარების მენეჯერის რამაზ სამხარაძის განცხადებით, "ძალიან ცუდი ტენდენციაა, როდესაც წინასაარჩევნოდ ერთ-ერთი მსხვილი მოთამაშე - "მეცხრე არხი" ბაზრიდან გავა, რადგან ამ ტელეკომპანიაში ძალიან ბევრი პროფესიონალი მუშაობს, რომლებიც ობიექტურ მასალაზე რისკების ფასად მუშაობდნენ".
ტელევიზიაში განვითარებულ მოვლენებთან დაკავშირებით ტელეკომპანია "მეცხრე არხის" გენერალურ დირექტორს ლუბა ელიაშვილს კომენტარი ამ დრომდე არ გაუკეთებია.
