თბილისში, სამტრედიის ქუჩაზე მდებარე ყოფილი აბანოს შენობიდან 20-მდე აფხაზეთიდან დევნილი ოჯახის გამოსახლება ხმაურის და ფიზიკური დაპირისპირების ფონზე მიმდინარეობს.
დევნილები ოკუპირებული ტერიტორიებიდან იძულებით გადაადგლებულ პირთა, ლტოლვილთა და განსახლების სამინისტროს ალტერნატიული საცხოვრებელი ფართის გამოყოფას სთხოვენ, წინააღმდეგ შემთხვევაში კი, მათი თქმით, პროტესტის უკიდურეს ზომებს მიმართავენ.
"ველოდებით სამინისტროსგან ალტერატიული საცხოვრებლის შემოთავაზებას, თუმცა ჯერ არავის არაფერი შემოუთავაზებია. წასასვლელი არსად გვაქვს. თუ ჩვენს სამინისტროს თანამშრომლებს ჰგონიათ, რომ ჩვენ გაგვასახლებენ და ისინი მშვიდად იჯდებიან და გააგრძელებენ მუშაობას, ძალიან შემცდარან. ან მოგვხედონ ან მოუწევთ ჩვენი ამოხოცვა,"- განაცხადა სამტრედიის ქუჩაზე მდებარე შენობაში მცხოვრებმა ერთ-ერთმა დევნილმა.
აღნიშნული შენობის მეპატრონის ვახტანგ გაჩეჩილაძის განცხადებით, მან დევნილების მიერ დაკავებული ფართი 2009 წელს შეიძინა და იძულებით გადააგგილებული პირები მის კერზო საკუთრებაში უკანონოდ შეიჭრნენ.
"ეს ფართი 2009 წელს საგადასახადო აუქციონზე ვიყიდე. დავფარე გადასახადი, ჩამოვაყალიბე კოოპერატივი, მქონდა თეთრეულის წარმოება, დევნილებმა გამიქურდეს, გამინადგურეს. მათი შეჭრის დღიდან მივმართე პოლიციას, მაგრამ არავითარი შედეგი,"- განაცხადა ვახტანგ გაჩეჩილაძემ.
სამტრედიის ქუჩაზე მდებარე შენობიდან დევნილების გამოსახლებას აღსრულების ბიუროს თანამშრომლები აწარმოებენ. აღნიშნულ საკითზე კომენტარი ოკუპირებული ტერიტორიებიდან იძულებით გადაადგლებულ პირთა, ლტოლვილთა და განსახლების სამინისტროს ჯერ-ჯერობით არ გაუკეთებია.
