"იმედის" მხრიდან "მაესტროსადმი" აგრესიულ შეტევას ჰქონდა ადგილი, როდესაც საზოგადოებრივ-პოლიტიკური თოქ-შოუების განყოფილების თანამშრომლებთან გადასვლის თაობაზე მოლაპარაკებებს აწარმოებდა,"- ამის შესახებ ტელეკომპანია "მაესტროს" ერთ-ერთმა მფლობელმა მამუკა ღლონტმა "ჯი-ეიჩ-ენთან" საუბრისას განაცხადა.
მისი თქმით, იგი დარწმუნებულია, რომ "მაესტროს" ყოფილ თანამშრომელებს არხის დატოვებისას არავითარი ბოროტი განზრახვა არ ჰქონდათ და ერთი ტელევიზიიდან სხვა ტელევიზიაში გადასვლა ჩვეულებრივი ამბავია".
რაც შეეხება მამუკა ღლონტის მიერ გაკეთებულ იმ განცხადებას, რომლის თანახმად, იგი მიიჩნევს, რომ ხელისუფლების კონკრეტული ფრთა ტელეკომპანია "მაესტროს" გამართულად მუშაობის ხელის შეშლას და დისკრედიტაციას მიზანმიმართულად ახორციელებს, ღლონტის თქმით, აღნიშნულ საკითხზე უფრო ვრცლად ოდნავ მოგვიანებით ისაუბრებს.
"ერთ-ერთ სახელმწიფო უწყებაში კონკრეტული შკითხვა გავგზავნეთ და მის პასუხს ველოდებით. გააჩნია პასუხი როგორი იქნება და თუ ჩვენი ეჭვები დადასტურდა, ამ საკითხზე უფრო ვრცლად მას შემდეგ ვისაუბრებთ,"- განაცხადა მამუკა ღლონტმა.
ამასთან, "მაესტროს" ხელმძღვანელი საქართველოს ფინანსთა მინისტრ ნოდარ ხადურს ყოფილი ხელისუფლების პირობებში რამდენიმე ცენტრალური ტელეკომპანიისთვის სახელმწიფო ბიუჯეტისადმი არსებული დავალიანების ჩამოწერის საკითხით დაინტერესებისა და აღნიშნულის კანონიერების შესწავლისკენ მოუწოდებს.
"მე ამ საკითხზე თვით ტელეკომპანია "იმედის" ეთერში გია ხუხაშვილის გადაცემაშიც ვისაუბრე. მაქვს კითხვები, რომლებზეც პასუხი უნდა გაეცეს - ყოფილი ხელისუფლების დროს როგორ, რა პირობებში, ვის მიერ, რის სანაცვლოდ, რა პრინციპით, ვისი ხელმოწერით და რა დამსახურებისთვის ჩამოეწერა ტელეკომპანია "იმედს", რუსთავი 2"-ს, "საზოგადოებრივ მაუწყებელს", "პიკს" და სხვა ტელევიზიებს ბიუჯეტის წინაშე არსებული მრვალმილიონიანი დავალიანებები, რის მეშვეობითაც, ახლა გარკვეულწილად პრივილეგირებულ მდგომარეობაში აღმოჩნდნენ,"- აღნიშნა ღლონტმა.
რაც შეეხება ტელეკომპანია "მაესტროს" ახალ სატელევიზიო სეზონზე მაუწყებლობის საკითხს, ღლონტის თქმით, "ტელევიზია არა თუ ბევრად უკეთეს რეჟიმში განაგრძობს მუშაობას, არამედ, მაყურებეელს საინტერესო და რეიტინგულ სეზონს ჰპირდება".