19 აგვისტოს, 11:00 აჭარის ა/რ მთავრობის თავმჯდომარე არჩილ ხაბაძე აჭარის ა/რ ჯანმრთელობისა და სოციალური დაცვის მინისტრთან ნუგზარ სურმანიძესათან ერთად მახინჯაურში, ყოფილ ჩვილ ბავშვთა სახლის შენობაში მიმდინარე სარეაბილიტაციო სამუშაოებს მინახულებენ, სადაც მალე „სარეაბილიტაციო ცენტრი „თანა" განთავსდება.
შენობის სრულ რეკონსტრუქციას „თურქეთის განვითარებისა და თანამშრომლობის სააგენტო" ახორციელებს. ამჟამად, სამუშაოები შენობის ოთხივე სართულზე მიმდინარეობს, იცვლება კარ-ფანჯრები, ელექტრო გაყვანილობა, წყლის და კანალიზაციის სისტემა, გათბობის სისტემა, მიმდინარეობს ეზოს კეთილმოწყობა. სარეაბილიტაციო სამუშაოები ორი თვის წინ დაიწყო და დაახლოებით ორ თვეში დასრულდება, რის შემდეგაც შენობაში სარეაბილიტაციო ცენტრი „თანა" - შეზღუდული შესაძლებლობების მქონე პირთა დღის ცენტრი და მიუსაფარ დედათა და ბავშვთა თავშესაფარი განთავსდება. ობიექტი სამედიცინო ასოციაცია „თანას" აჭარის ფინანსთა და ეკონომიკის სამინისტრომ 2013 წელის დასაწყისში 10 წლის ვადით უსასყიდლო სარგებლობის უფლებით გადასცა.
დღესვე აჭარის მთავრობის თავმჯდომარე არჩილ ხაბაძე და ჯანდაცვის მინისტრი ნუგზარ სურმანიძე, ხელვაჩაურის რაიონის სოფელ ცხემლარში თემის სამედიცინო პუნქტს გახსნიან. გახსნის ცერემონიალს აჭარის ა/რ უმაღლესი საბჭოს ჯანმრთელობის დაცვის და სოციალურ საკითხთა კომისიის თავმჯდომარე ჯემალ ფუტკარაძე და თურქეთის რესპუბლიკის გენერალური კონსული აჭარაში ენგინ არიქანი დაესწრებიან.
სოფელ ცხემლარში თემის სამედიცინო პუნქტის მშენებლობა ორი თვის წინ დაიწყო. ადგილობრივებმა აჭარის ჯანდაცვის სამინისტროს ექიმამდელი სამედიცინო დაწესებულების მშენებლობის მოთხოვნით გასული წლის ბოლოს მიმართეს. სამინისტრომ პროექტის განხორციელება „თურქეთის განვითარებისა და თანამშრომლობის სააგენტოს" ფინანსური მხარდაჭერით დაიწყო.
ამავე სააგენტოს დახმარებით სამედიცინო პუნქტი სრულად აღიჭურვა საოფისე და სამედიცინო ინვენტარით .
