პარტია "თავისუფალი საქართველოს" ლიდერი კახა კუკავა არასაპარლამენტო ოპოზიციის ერთიანი საპრეზიდენტო კანდიდატის გამოსავლენად პრაიმერის ჩატარების ინიციატივით გამოდის.
როგორც კუკავამ დღეს გამართულ პრესკონფერენციაზე განაცხადა, "ხელისუფლება ყველაფერს აკეთებს იმისათვის, რომ კოალიცია "ქართული ოცნების" საპრეზიდენტო კანდიდატ გიორგი მარგველაშვილის შემდეგ, საპრეზიდენტო არჩევნებში ხმათა რაოდენობით მეორე ადგილზე "ნაციონალური მოზრაობის" საპრეზიდენტო კანდიდატი დავით ბაქრაძე გავიდეს".
"ჩავატაროთ სოციოლოგიური გამოკითხვა ანუ პრაიმერი. რომლის შედეგადაც არასაპარლამენტო ოპოზიციის ერთიანი საპრეზიდენტო კანდიდატი შეირჩევა და მას არჩევნების მეორე ტურამდე მიყვანის რალური შანსი ექნება და მეორე ტურში ხელისუფლების კანდიდატს დაამარცხებს. ბუნებრივია, ჩვენი მიმართვის ადრესატები პირველ რიგში ქალბატონი სალომე ზურაბიშვილი, ნინო ბურჯანაძე, კობა დავითაშვილი, შალვა ნათელაშვილი და ის კანდიდატები არიან, რომლებიც ძირითადად ინაწილებენ არასაპარლამენტო ოპოზიციის ხმებს. არავისთვის საიდუმლო არ არის, რომ ხელისუფლება, ყოველ შემთხვევაში, მისი გარკვეული ფლანგი არა მხოლოდ იმაზე მუშაობს, რომ გიორგი მარგველაშვილმა პირველი ადგილი მიიღოს, არამედ, "ქართული ოცნება" ზრუნავს იმაზე, რომ დავით ბაქრაძემ მეორე ადგილი აიღოს და შემდეგ ერთმანეთს მიულოცონ - მარგველაშვილმა ბაქრაძეს მეორე ადგილი და ბაქრაძემ მარგველაშვილს თავისი პირველი ადგილი,"- განაცხადა კახა კუკავამ.
