"სადაც არა სჯობს, გაცლა სჯობს"- ასე გამოეხმაურა პოლიტოლოგი სოსო ცისკარიშვილი ცენტრალური საარჩევნო კომისიის თავმჯდომარე ზურაბ ხარატიშვილის მიერ თანამდებობიდან გადაგომის შესახებ მიღებულ გადაწყვეტილებას.
ცისკარიშვილის შეფასებით, ზურაბ ხარატიშვილი "ნაციონალური მოძრაობის" მაღალი ნდობით აღჭურვილი პირია და და მისი თანამდებობიდან წასვლაც შემთხვევითი არ არის.
"ორი ვარიანტია - მან ან თავად გააკეთა დროული დასკვნა იმის თაობაზე, რომ ამ არჩევნებს "ნაციონალური მოძრაობა" წარმოაჩენს როგორც ყველაზე უსამართლოს, გაყალბებულს და იგი ძალაუნებურად საკმაოდ უხერხულ მდგომარეობაში აღმოჩნდებოდა, ამ თავად მისმა მეგობრებმა "ნაციონალურ მოძრაობიდან" იგი გააფრთხილეს, რომ "სადაც არა სჯობს, გაცლა სჯობს", და სჯობს, ვინმე სხვა ახალი თავმჯდომარე, თუნდაც გამოუცდელობის გამო იარლიყდაკიდებული გამყალბებელი იყოს,"- განაცხადა სოსო ცისკარიშვილმა.
რაც შეეხება ხარატიშვილის პრეზიდენტობის კანდიდატად დასახელებასთან დაკავშირებით გავრცელებულ ინფორმაციას, ცისკარიშვილი ცენტრალური საარჩევნო კომისიის თავმჯდომარეს ამომრჩევლის სტატუსით დაკმაყოფილებას ურჩევს.
ცნობისთვის, საქართველოს ცენტრალური საარჩევნო კომისიის თავმჯდომარე ზურაბ ხარატიშვილმა თანამდებობის დატოვების მოთხოვნით პარლამენტს გუშინ მიმართა. ხარატიშვილი მისი გადაწყვეტილების მიზეზებზე 15 აგვისტოს ისაუბრებს.