წლევანდელ ერთიან ეროვნულ გამოცდებზე 42 000 აბიტურიენტიდან 13 000-მა მინიმალური კომპეტენციის ზღვარის გადალახვა ვერ შეძლო.
გამოცდების ეროვნული ცენტრის მიერ გამოქვეყნებული სტატისტიკური მონაცემების თანახმად, პროცენტულად ყველაზე მეტი აბიტურიენტი ფიზიკის გამოცდაში ჩაიჭრა.
გამოცდების ეროვნული ცენტრის ხელმძღვანელის მაია მიმინოშვილის განცხადებით, ამავე სტატისტიკური მონაცემებით, სასერტიფიკაციო გამოცდებზე ბარიერის გადალახვა საქართველოს საშუალო და დაწყებითი საჯარო სკოლების პედაგოგთა 84%-მა ვერ შეძლო.
"სასერტიფიკაციო გამოცდები 2010 წლიდან ტარდება და თუ სტატისტიკას გადავხედავთ, აღმოვაჩენთ, რომ წინა წლების შედეგებთან შედარებით, წელს დრამატული სხვაობა ნამდვილად არ არის. მაგალითისთვის შემიძლია მოვიყვანო 2011 წელს პირველად ჩატარებული სასერტიფიკაციო გამოცდის ფიზიკის საგამოცდო შედეგები, მაშინ იმ პედაგოგთა რაოდენობა, რომლებმაც ბარიერი ვერ გადალახეს, 92% იყო. ეს მაჩვენებელი ოდნავ გაიზარდა და წელს 96%-ია. აქედან გამომდინარე, ბუნებრივია, ჩვენთვის პირადად, კატეგორიულად მიუღებელია ისეთი განცხადებები, განსაკუთრებით იმ პირებისგან და ადამიანებისგან, რომლებსაც ამ წლების განმავლობაში აღნიშნული პრობლემის მოგვარებაზე ზრუნვა პირდაპირ ევალებოდათ. რაც შეეხება აბიტურიენტების მდგომარეობას, რომლებმაც პირველადი შედეგების საფუძველზე ერთ საგანში მაინც ბარიერის გადალახვა ვერ მოახერხეს, მათი რაოდენობა დაახლოებით, 13 000-ია. თუ იმას გავითვალისწინებთ, რომ წელს წინა წლებთან შედარებით, აბიტურიენტების გაცილებით დიდი რაოდენობა იყო, ზღვარსვერგადალახული აბიტრიენტების პროცენტული რაოდენობა მეტად თუ ნაკლებად იგივეა,"- განაცხადა მაია მიმინოშვილმა.