გუდანიდან შატილის მიმართულებით გუშინ საღამოს დაძრული 5 ტურისტი უკვე იპოვეს.
როგორც "ჯი-ეიჩ-ენს" მცხეთა მთიანეთის მხარეში პრეზიდენტის რწმუნებულ/გუბერნატორმა ხათუნა ოჩიაურმა განუცხადა, 2 ქართველი და 3 ფრანგი ტურისტისგან შემდგარი ჯგუფი გუშინ გვიან საღამოს გაუჩინარდა.
მისი თქმით, ტურისტების გაუჩინარების შესახებ მიღებული ცნობისთანავე, სამძებრო სამუშაოებში მცხეთა-მთიანეთის გუნერნატორის მოადგილე გივი ამირხანაშვილი მცხეთის სამაშველო ბრიგადის 9 კაციან ჯგუფთან ერთად მონაწილეობდა.
"ეს წუთია მივიღე ინფორმაცია, რომ დაკარგული ტურისტები იპოვეს. ისინი გუშინ საღამოს გუდანიდან შატილის მიმართულებით დაიძრნენ და როდესაც დათქმულ დროზე დანიშნულების ადგილზე არ გამოცხადდნენ, ატყდა განგაში. ჩვენის მხრივ, სამაშველო ბრიგადა ჩავრთეთ სამძებრო სამუშაოებში. მაშველებს ჩემი მოადგილე გივი ამირხანაშვილიც გაყვა და მათ ტურისტების მიერ გასავლელი მარშრუტი თავიდან ბოლომდე გადაამოწმეს,"- განაცხადა ხათუნა ოჩიაურმა.