ქალაქ თბილისის მერის გიგი უგულავას განცხადებით, "თბილისის მერია უპრობლემოდ დაამტკიცებს დედაქალაქის შემოვლითი რკინიგზის ნებისმიერ პროექტს, თუკი მას მთავრობა სახეშეცვლილად შეიტანს".
როგორც უგულავამ თბილისის შემოვლითი რკინიგზის მშენებლობის შესაძლო შეჩერების ან "დაკონსერვების" კომენტირებისას აღნიშნა, "არ შეიძლება ეს გადაწყვეტილება გუნცაძემ მიიღოს, რომელიც კარგად მოერგო რკინიგზას ან - კვირიკაშვილმა, რომელიც აზრზე არ არის".
"თვითონვე დაგეგმონ, თვითონვე გაუშვან პრივატიზაციაში და თვითონვე განკარგონ. არაფერი საერთო არ შეიძლება ჰქონდეს მერიას. ერთადერთი, რაც შეიძლება გაკეთდეს, რა პროექტსაც შემოიტანენ, ყოველგვარი პრობლემების გარეშე დავუმტკიცებთ. ოღონდ გააგრძელონ და არ გააფუჭონ ეს მართლაც საუკუნის საქმე. რადგან არ შეიძლება ეს გადაწყვეტილება ცალკე აღებული კოკა გუნცაძემ, რომელიც კარგად მოერგო რკინიგზაში, მიიღოს. არ შეიძლება ეს გადაწყვეტილება ცალკე აღებულმა გიორგი კვირიკაშვილმა მიიღოს, რომელიც რაღაც გზის დახრებზე საუბრობს, აზრზე არ არის. ახლა რა დოკუმენტსაც აფრიალებენ, ეს არის ფინანსური კვლევა. ფინანსურ კვლევაში, რა თქმა უნდა, მკვლევარი ეტყვის, რომ არ არის რენტაბელური, მაგრამ არ არის რენტაბელური, მაგალითად ჭიათურა-თბილისის რკინიგზა, მთელი სამგზავრო გადაზიდვა არ არის რენტაბელური, მაგრამ ბენზინმა და ნავთობმა უნდა იგრიხინოს ქალაქში?!", - განაცხადა გიგი უგულავამ.
აღნიშნულ საკითხზე კომენტარი საქართველოს ეკონომიკის მინისტრმა გიორგი კირიკაშვილმაც გააკეთა. მინისტრი არ ადასტურებს, რომ თბილისის შემოვლითი რკინიგზის მშენებლობის პროექტი შეჩერებულია. მისი თქმით, "აღნიშნული საკითხი შესწავლის პროცესშია და ამ ეტაპზე არაა გამორიცხული, რომ მშენებლობის დროებით კონსერვაცია მოხდეს".
"ოფიციალურად საბოლოო გადაწყვეტილება არ არის დაფიქსირებული. ჩვენ გვქონდა ამ საკითხის განხილვა და ისეთი ტექნიკური დეტალებია, როგორიცაა გზის დახრილობა და ასე შემდეგ. ამის შესწავლა როგორც ამბობენ, საწუხაროდ წინასწარ არ მოხდა. ჩვენ ვფიქრობთ, რომ რაღაც პერიოდი ეს პროექტი უნდა დავაკონსერვოთ და შემდგომში უკეთესი ტექნიკური გადაწყვეტილების მომზადების შემთხვევაში, დავუბრუნდეთ,"- განაცხადა გიორგი კვირიკაშვილმა.
"საქართვლოს რკინიგზის" სამეთვალყურეო საბჭოს თავმჯდომარე კოკა გუნცაძის განცხადებით კი, გამტარუნარიანობის გაუმჯობესების თვალსაზრისით, აღნიშნული სარკინიგზო მაგისტრალი წამგებიანია, რადგან რიკოთის უღელტეხილზე კიდევ ერთ მალიმიტირებელ მონაკვეთს გააჩენს და თბილისის შემოვლითი სალიანდაგო გზის მშენებლობის უკან ყოფილი ხელისუფლების ზოგიერთი წარმომადგენლის პირადი ინტერესები უფრო დგას.
"ყოველწლიურად 50%-ით გაიზრდება მოვლა-შენახვის და საოპერაციო ხარჯები. მოძრაობის ორგანიზება ტექნიკურად გართულდება. და რაც ყველაზე მნიშვნელოვანია, საქართველოს რკინიგზაზე გამტარუნარიანობა კიდევ უფრო შემცირდება და კიდევ ერთი მალიმიტირებელი მონაკვეთი გაჩნდება რიკოთის უღელტეხილის გვერდით. ასე რომ, ერთ მხარეზეა ჩვენი ქვეყნის სატრანზიტო ფუნქცია, რომლის ერთ-ერთი მთავარი კომპონენტიც საქართველოს რკინიგზაა და მეორე მხარეს დგას ყოფილი ხელისუფლების ზოგიერთი წარმომადგენლის ინტერესები - გამოთავისუფლებული მიწები საკუთრებაში მიეღოთ,"- განაცხადა კოკა გუნცაძემ.
თბილისის შემოვლითი რკინიგზის მშენებლობის გაგრძელების საკითხთან დაკავშირებით, საქართველოს მთავრობა საბოლოო გადაწყვეტილებას უახლოეს მომავალში მიიღებს.
