გარდაბნის რაიონის გამგებლის მოადგილე ტელმან ქსანოვი თანამდებობიდან გაათავისუფლეს, პროტესტის ნიშნად კი, სამსახური ერთ-ერთი დეპარტამენტის უფროსმა მარინა პირველმაც დატოვა.
გამგებლის უკვე ყოფილი მოადგილის და გამგეობის საფინანსო განყოფილების ყოფილი უფროსის განცხადებით, რაიონის თვითმმართველ ორგანოებს ამ დრომდე "ნაციონალური მოძრაობის" წევრები მართავენ და ისინი "ქართული ოცნების" წარმომადგენელთა შევიწროებას ახდენენ.
"ქართული ოცნების" შტაბის უფროსი გელა ხუციშვილი, რომელიც ოთხი თვის განმავლობაში გამგებლად მუშაობდა, მოხსნეს და ისევ უშიშროების ხალხი მოიყვანეს. დღეს გამგებელი უშიშროების პოლკოვნიკი გახდა. მოსვლიდან ერთი საათი არ იყო გასული, ბრძანება დამიწერა და თანამდებობიდან გამათავისუფლეს. მე მომხსნეს სამსახურიდან და "ნაციონალური მოძრაობის" ხალხი მოიყვანეს. ესეიგი, ასეთი დავალება აქვს მიცემული,"- განაცხადა ტელმან ქსანოვმა.
ამასთან, გარდაბნის რაიონის გამგეობის საფინანსო სამსახურის ყოფილი ხელმძღვანელი მარინა პირველი ამომრჩევლებს დაპირების შეუსრულებლობის გამო ბოდიშსაც უხდის და საქართველოს პრემიერ-მინისტრ ბიძინა ივანიშვილთან შეხვედრას ითხოვს.
"მე დღეს განცხადება დავწერე და სამსახურიდან მივდივარ, თუმცა ეს იმას არ ნიშნავს, რომ პარტიიდანაც მივდივარ. მე ქუჩაში იმისთვის გამოვედი და იმისთვის ვიბრძოლე, რომ გარდაბანში მიწების განაწილებასთან დაკავშირებით არსებული "მაფია" დაგვემარცხებინა, მაგრამ, სამწუხაროდ ვერ შევძელით. როდესაც ხალხს დავპირდით, რომ მიწები დაუბრუნდებოდათ და დღესაც თივის გარეშე დარჩნენ, მე ჩემს თავს დამარცხებულად ვაცხადებ და ბოდიშს ვუხდით ამომრჩეველს,"- განაცხადა მარინა პირველმა.
