ხელვაჩაურის რაიონის სოფელ ცხემლარში თემის სამედიცინო პუნქტის მშენებლობა ორი თვის წინ დაიწყო. ობიექტი დღეს აჭარის ა/რ ჯანმრთელობისა და სოციალური დაცვის მინისტრმა ნუგზარ სურმანიძემ, მინისტრის მოადგილემ ლევან გორგილაძემ და ხელვაჩაურის მუნიციპალიტეტის გამგებლის მოადგილემ დავით ყიფშიძემ მოინახულეს.
სოფელ ცხემლარში პირველადი სამედიცინო დაწესებულების მშენებლობის მოთხოვნით ადგილობრივებმა აჭარის ჯანდაცვის სამინისტროს გასული წლის ბოლოს მომართეს. სამინისტრომ პროექტის განხორციელება „თურქეთის განვითარებისა და თანამშრომლობის სააგენტოს" ფინანსური მხარდაჭერით დაიწყო. სააგენტო სამედიცინო პუნქტის საოფისე და სამედიცინო ინვენტარით აღჭურვასაც უზრუნველყოფს. ინვენტარის ნაწილი (დეფიბრილატორი, წნევის საზომი აპარატი, შაქრის საზომი აპარატი, სტერილიზატორი, მაცივარი და სხვა) დაწესებულებას უკვე გადაეცა.
მოსახლეობა ახალაშენებულ პუნქტში ექიმამდელ სამედიცინო დახმარებას კვირის ბოლოს მიიღებს. აქამდე მათ იგივე მომსახურების მისაღებად კილომეტრების გავლა უხდებოდათ.
ადგილობრივები სფელში სტომატოლოგიური კაბინეტის გახსნასაც ითხოვენ, თუ აღნიშნული საკითხით ამ დარგის სპეციალისტები დაინტერესდებიან, მათ მომსახურების მისაწოდებლად თემის სამედიცინო პუნქტის შენობით სარგებლობის უფლება მიეცემათ.
მასალის გამოყენების პირობები
