საქართველოს მიერ ევროკავშირთან ღრმა და ყოვლისმომცველი თავისუფალი ვაჭრობის ხელშეკრულებაზე შეთანხმების მიღწევის შემდეგ, ევროკავშირის ქვეყნებში საქართველოს საინვესტიციო პოტენციალის რეკლამირებას იწყებს.
ამ მიზნით, ეკონომიკისა და მდგრადი განვითარების მინისტრი გიორგი კვირიკაშვილი ევროპის საინფორმაციო ტელეარხის „ევრონიუსის" ხელმძღვანელობას, 24 ივლისს შეხვდა.
როგორც დღეს მთავრობის სხდომის დასრულების შემდეგ გიორგი კვირიკაშვილმა განაცხადა, ქართული მხარის სურვილია, რომ „ევრონიუსმა" ქართულ ენაზეც იმაუწყებლოს.
„მას შემდეგ რაც საქართველომ ევროკავშირთან დაასრულა მოლაპარაკებები ღრმა და ყოვლისმომცველი თავისუფალი ვაჭრობის ხელშეკრულებაზე შემდგომი ნაბიჯია საინფორმაციო კამპანია, ის სადაც მაუწყებლობს „ევრონიუსი". ეს ყველაფერი კი აუცილებლად განხორციელდება იმისათვის, რომ მოხდეს ცნობადობის ზრდა საქართველოსი როგორც მიმზიდველი საინვესტიციო მიმართულების. ეს არის პირველი ეტაპი. „ევრონიუსის" გენერალური დირექტორი გამოთქვამს მზადყოფნას, რომ გრძელვადიან თანამშრომლობაზე მოხდეს ჩამოყალიბება. შესაძლოა, რომ მათი წარმომადგენლობა საქართველოში გაიზარდოს. საერთოდ პერსპექტივაში სასურველი იქნება, რომ იმ 13 ენაზე რომლითაც მაუწყებლობს დღეს „ევრონიუსი", დაემატოს ქართული ენაც. თუმც ამ ეტაპზე ამაზე საუბარი ნაადრევია"- განაცხადა გიორგი კვირიკაშვილმა.
