შოთა რუსთაველის ეროვნული ცენტრის ფონდის მხარდაჭერით საქართველოს ეროვნულ არქივში ქართველოლოგიის საზაფხულო სკოლა „საქართველოს პირველი დემოკრატიული რესპუბლიკა (1918-1921)" გაიხსნა.
ღონისძიებაში მონაწილეობა იუსტიციის მინისტრის პირველმა მოადგილე დავით ჯანდიერმა, ეროვნული არქივის გენერალურმა დირექტორმა თეონა იაშვილმა და რუსთაველის ეროვნული სამეცნიერო ფონდის წარმომადგენლებმა მსმენელებსა და ლექტორებთან ერთად მიიღეს.
იუსტიციის მინისტრის პირველი მოადგილე დავით ჯანდიერის განცხადებით, „როგორც ქართველ, ისე უცხოელ მსმენელებს ექნებათ შესაძლებლობა, გაეცნონ 1918 წლის საქართველოს დამოუკიდებლობის გამოცხადებას, ასევე, 1921 წლის კონსტიტუციის მიღებასთან დაკავშირებულ პერიოდს. ეს არის ძალიან მნიშვნელოვანი დოკუმენტი, რადგან მას მრავალმხრივად ეყრდნობა საქართველოს დღეს მოქმედი კონსტიტუცია. საზაფხულო სკოლა საშუალებას მისცემს ქართველ და უცხოელ მსმენელებს, დაამყარონ კონტაქტები სამეცნიერო და სტუდენტურ წრეებთან".
საზაფხულო სკოლას 20 მსმენელი ჰყავს, მათ შორის, უცხო ქვეყნის - 15 და საქართველოს - 5 მოქალაქე. პროექტის მიზანია უცხოელი და ქართველი მონაწილეებისათვის საქართველოს პირველი დემოკრატიული რესპუბლიკის პოლიტიკური, ეკონომიკური, სოციალური, კულტურული ყოფის გაცნობა, ასევე, საქართველოსა და კავკასიის რეგიონის შესახებ ეროვნულ არქივში დაცულ 1918-1921 წლების დოკუმენტებზე უცხოელ მეცნიერთა ინფორმირება. საზაფხულო სკოლა უცხო ქვეყნის სამეცნიერო წრეებში ხელს შეუწყობს საქართველოს პირველი დემოკრატიული რესპუბლიკის შესახებ ცნობადობის ამაღლებას, ქართველ და უცხოელ მეცნიერთა შორის კონტაქტების გაღრმავებას.
წამყვანი ქართველი სპეციალისტები საზაფხულო სკოლის მონაწილეებს 7 დღის განმავლობაში 23 ლექციას ჩაუტარებენ. ამასთან, მსმენელთათვის გათვალისწინებულია კულტურული ღირსშესანიშნაობებისა და მუზეუმების დათვალიერება. მონაწილეები გაეცნობიან საარქივო დოკუმენტებს, შესაბამისი პერიოდის აუდიოვიზუალურ მასალას.