საქართველოს მთავრობამ შეერთებული შტატების მოქალაქის, ჩარლზ არტურ ფლეტჩერის ექსტრადირება მოახდინა, რომელიც ძალადობაშია ბრალდებული.
საქართველოში აშშ-ის საელჩოს ინფორმაციით, მის წინააღმდეგ საქმე 2012 წელს, ვაშინგტონის შტატში აღიძრა.ფლეტჩერს აშშ-ში შეერთებული შტატების სამართალდამცველი უწყებების წარმომადგენლები გაჰყვნენ. ფლეტჩერი ითვლება უდანაშაულოდ, სანამ მის ბრალს სასამართლო არ დაადასტურებს.
2012 წლის 13 ნოემბერს, გამოძიების ფედერალური ბიუროს თბილისის წარმომადგენლობის, საქართველოს შინაგან საქმეთა და იუსტიციის სამინისტროებისა და ინტერპოლის თანამშრომლობის შედეგად, ფლეტჩერი საექსტრადიციო პროცედურების დასრულებამდე საპყრობილეში მოათავსეს.
გამოძიების ფედერალური ბიუროს სიეტლის განყოფილების სპეციალურმა აგენტმა ლორა მ. ლაფლინმა განაცხადა, რომ „გამოძიების ფედერალური ბიურო აფასებს საქართველოს შინაგან საქმეთა და იუსტიციის სამინისტროების მნიშვნელოვან წვლილს გაქცეული ბრალდებულის საქმის გამოძიების, მისი დაპატიმრებისა და ექსტრადიციის საქმეში. აღნიშნულ უწყებებთან ძლიერი და ხანგრძლივი თანამშრომლობის წყალობით, ბატონ ფლეტჩერს სერიოზული ბრალდებები წარედგინება."