დღეს, 17 ივლისს, 14:00 საათზე, „მის საქართველო 2013" -ის ორგანიზატორები კომპანია "იმიჯ-ცენტრი" და "ტოიოტა ცენტრი თბილისი" ტოიოტა ცენტრში პრესკონფერენციას გამართავენ.
ორგანიზატორთა განცხადებით, "მის საქართველო 2013" იქნება მასშტაბური ღონისძიება, რომელიც ხორციელდება ტელეკომპანია იმედის და ღონისძიების სხვადასხვა პარტნიორების მხარდაჭერით.
კონკურსის რეგისტრაცია გრძელდება შემოდგომამდე. კონკურსში მონაწილეობის მისაღებად კომპანია "იმიჯ-ცენტრი" იწვევს 17-25 წლამდე ასაკის გოგონებს ნ. ნიკოლაძის 6-ში.
ტრადიციულად კონკურსის გამარჯვებული დაჯილდოვდება მთავარი პრიზით - ავტომობილით, რომელსაც აწესებს კომპანია "ტოიოტა ცენტრი თბილისი" და გამარჯვებულ "მის საქართველო 2013"-ს გადაეცემა ახალი მოდელის, ელეგანტური ავტომობილი "ტოიოტა RAV 4".
"მის საქართველო 2013"-ის გამარჯვებული ტოპ-5 გაემგზავრება სილამაზის საერთაშორისო კონკურსებზე.
პრესკონფერენციაზე აგრეთვე ცნობილი გახდება ვინ წარადგენს საქართველოს 28 სექტემბერს, ინდონეზიის დედაქალაქ ჯაკარტაში, სილამაზის საერთაშორისო კონკურსზე "მის მსოფლიო 2013".
კონკურსანტის ჩაცმულობაზე იზრუნებს მოდის სახლი "მარიონელა", რომელიც სპეციალურად ამ ღონსძიებისთვის უზრუნველყოფს სასცენო საღამოს კაბით, ეროვნულ ჩაცმულობით და კოქტეილის კაბებით.
კომპანია "იმიჯ-ცენტრი" გახლავთ "მის საქართველო"-ს ორგანიზატორი და მსოფლიოში აღიარებული სილამაზის საერთაშორისო კონკურსების "Miss World"-ის, "Miss Universe-ის, "Miss Intercontinental"-ის და "Miss Tourism International"-ის ექსკლუზიური წარმომადგენელი საქართველოში.
კონკურსი "მის საქართველო" ყოველწლიური პროექტია, რომელიც უკვე მეთერთმეტედ ტარდება და დიდი პოპულარობით სარგებლობს საქართველოს მოსახლეობაში.
პროექტი "მის საქართველო" ემსახურება ქვეყნისათვის ისეთ მნიშვნელოვან მიმართულებების განვითარებას, როგორიცაა: - საქართველოს კულტურის, ხელოვნების, ფოლკლორის პოპულარიზაცია საერთაშორისო ასპარეზზე. ტურიზმის განვითარება, ჯანმრთელი ცხოვრების წესის პროპაგანდა ახალგაზრდებში, მოდისა და ხელოვნების სფეროების განვითარება, სხვადასხვა ტიპის ღონისძიებების განხორციელება. ქართული და საერთაშორისო ბრენდების და პროდუქციის პოპულარიზაცია და მათი ცნობადობის ხელშეწყობა.
