„საქართველოს ახალგაზრდა კონსტიტუციონალისტთა ასოციაცია" 2013 წლის 17 ივლისს 13:00 სთ-ზე სასტუმრო „Holiday Inn-ში" აწყობს მრგვალ მაგიდას სახელწოდებით „ახალგაზრდები საკონსტიტუციო ცვლილებებისთვის".
როგორც „ჯი-ეიჩ-ენს" ორგანიზატორებმა აცნობეს, განხილულ იქნება ინიცირებული საკონსტიტუციო ცვლილებები და შეთავაზებული იქნება ალტერნატივები კონსტიტუციაში შესატან ცვლილებებთან დაკავშრებით. ღონისძიებას დაესწრებიან საკონსტიტუციო ცვლილებების საყოველთაო-სახალხო განხილვის საორგანიზაციო კომისიის წევრები (გიორგი კახიანი,თინათინ ბოკუჩავა, ირინე იმერლიშვილი, გიორგი კვერენჩხილაძე, ნანა ჭიღლაძე.) საქართველოს ახალგაზრდული არასამთავრობო და პოლიტიკური პარტიების ახალგაზრდული ორგანიზაციების ლიდერები, დარგის ექსპერტები. მრგვალი მაგიდის თითოეულ მონაწილეს საშუალება ექნება უშუალოდ მიმართოს საორგანიზაციო კომისიის წევრებს კითხვით ან დააფიქსიროს საკუთარი პოზიცია.
მნიშვნელოვანია, რომ მონაწილეების მიერ დაფიქსირებული პოზიცია აისახება შემაჯამებელ სარეკომენდაციო დოკუმენტში, რომელიც გადაეცემა საკონსტიტუციო ცვლილებების საყოველთაო-სახალხო განხილვის საორგანიზაციო კომისიას.