ბიძინა ჩოლოყაშვილის, შალვა და ელიზბარ ქსნის ერისთავების საძვალე, ძველი ქართული ხუროთმოძღვრების ძეგლი - იკორთის ტაძარი სავალალო მდგომარეობაშია. ინფორმაციას ამის შესახებ ოსი სეპარატისტები ავრცელებენ და ტაძარს „სამხრეთ ოსეთის ერთ ერთ უძველეს მართლმადიდებლურ ტაძარს" უწოდებენ.
სეპარატისტების ინფორმაციით, იკორთის ტაძრის რესტავრაცია „სამხრეთ ოსეთის სოციალ-ეკონომიკური განვითარების 2014-1017 წლის საინვესტიციო პროგრამაშია შეტანილი".
„ჩვენი რესპუბლიკის არქიტექტურული ძეგლები სავალალო მდგომარეობაშია და ყოველწლიურად მათი მდგომარეობა სულ უფრო და უფრო მძიმდება.
არქიტექტურული ძეგლების აღდგენა-რესტავრაციისათვის რესპუბლიკის ბიუჯეტში არც ერთი რუბლი არ არის გათვალისწინებული", _ აცხადებს ოკუპირებულ ცხინვალის რეგიონში მოქმედი ე.წ. კულტურის სამინისტროს წარმომადგენელი.
შეგახსენებთ, რომ იკორთის ტაძარი - ძველი ქართული მართლმადიდებლური ტაძარი, მდებარეობს სოფელ იკორთას (გორის მუნიციპალიტეტი) განაპირას, მთის კალთაზე. გუმბათოვანი ტაძარი აგებულია 1172 წელს. ფეოდალურ ხანაში იკორთა ქსნის ერისთავთა ერთ-ერთი რეზიდენცია იყო შიდა ქართლში.
იკორთის ტაძარს განსაკუთრებული ადგილი უჭირავს ქართულ ხუროთმოძღვრების ისტორიაში. ქრონოლოგიურად და მხატვრულსტილისტიკური თავისებურებებით იგი ნიმუშია XII-XIII საუკუნეების მიჯნაზე შექმნილი ქართლის გუმბათოვანი ტაძრებისა, რომლებშიც საბოლოოდ შემუშავდა ქართული გუმბათოვანი ეკლესიის კანონიკური სახე.
იკორთის ტაძარში არიან დაკრძალული კახეთის აჯანყების (1659) ხელმძღვანელები: ბიძინა ჩოლოყაშვილი, შალვა და ელიზბარ ქსნის ერისთავები.