საქართველოს ფინანსთა სამინისტრომ მონაწილეობა მიიღო ჟურნალ „სითი"-სა და დიმიტრი ცინცაძის სახელობის ფონდის ერთობლივ საქველმოქმედო აქციაში ლეიკემიით დაავადებულ ბავშვთა დასახმარებლად, რომელიც დღეს ვაკის პარკში გაიმართა. აქციის მონაწილეები გიორგი გაბედავას დასახმარებლად გაერთიანდნენ.
საკუთარი სურვილით თანხა პატარა გიორგის სიცოცხლის გადასარჩენად ფინანსთა სამინისტროს თოთოეული დეპარტამენტის, აგრეთვე სამინისტროს სიპების თანამშრომლებმა გაიღეს. თანხა დღეს ფონდის წარმომადგენლებს გადაეცათ.
„საქართველოს ფინანსთა სამინისტროს თანამშრომლებმა ეს თანხა გავიღეთ, რათა გადავარჩინოთ პატარა გიორგის სიცოცხლე. სამინისტრო პირველი იყო, ვინც მ.იაშვილის სახელობის ბავშვთა ცენტრალურ საავადმყოფოსთან არსებულ „სისხლის ბანკთან" გააფორმა მემორანდუმი. სამინისტროს თანამშრომლები პერმანენტულად გაიღებენ სისხლს, რათა გადავარჩინოთ ლეიკემიით დაავადებული ბავშვები. საქველმოქმედო აქციებში პირადად აქტიურადაა ჩართული ფინანსთა მინისტრი ნოდარ ხადური, რომელიც კოლეგებთან ერთად მუშაობს, რათა უახლოეს მომავალში საქართველოში გაიხსნას ტრანსპლანტაციის ცენტრი, რათა რაც შეიძლება მეტი ბავშვის სიცოცხლე გადავარჩინოთ ჩვენს ქვეყანაში," - განაცხადა ფინანსთა სამინისტროს საზოგადოებასთან ურთიერთობის მიმართულების ხელმძღვანელმა ხათუნა ივანიშვილმა.
საქველმოქმედო აქციაში მონაწილეობა მიიღეს ჟურნალისტებმა, ჟურნალი „სითი"-ს მკითხველებმა, სხვადასხვა ორგანიზაციებისა და სამინისტროების წარმომადგენლებმა.
